Problema di holó desagradabel na parke di Mangrove.

Presidente di Parlamento

Sra. America Francisca

Wilhelminaplein #4

Presente

 

Kòrsou, 14 yüli 2023

 

Tópiko: Problema di holó desagradabel na parke di Mangrove.

Apresiable minister Cooper,

Nos a tuma nota ku e parke di Mangrove tin hopi molèster di “overstort ” di awa di kloaka.  Carmabi mester a sera e parke na diferente okashon pa asina evitá ku bishitante nan di mangrove park lo  haña molèster di e holó  desagradabel.  Esaki no por.  Nos tin e úniko parke di mangrove na mundu ku ta den un sentro di siudat i nos mester sòru pa e molèster aki no sosodé.

Nos a tuma nota ku e parke ta sera awor por kompleto i ku den un matutino a publiká ku e parke lo habri den korto tempu. I ora e habri lo no por hasi uso di tur su fasilidatnan. Pero nèt awor ku tin fakansi i ku mayornan por a bai ku nan yunan bai konosé i gosa aki den nos sentro, e lo mester keda sera.

Ta importante ku Minister di VVRP por informá parlamento ta ki akshonnan lo wòrdu tuma pa remediá e situashon aki mas pronto posibel asina nos muchanan por hasi uso di e parke awor ku ta fakansi. Di turista di bishita aki na nos isla nos no por papia mes.

Den e kuadro aki  nos ke pidi un vragenuur a base di artíkulo 96a riba e tópiko: “ Problema di holó desagradabel na parke di Mangrove”.

Den e vragenuur aki lo mi ke mira e siguiente preguntanan kontesta:

1. Pakiko tin e problema di awa di kloaka den parke Mangrove?
2. Kiko ta okashoná esaki ku tòg tin “overstort”?
3. Nos ta na altura ku den e plan pa yega na e parke di mangrove netamente a bini ku un “gemaal ” nobo na SVB pa evitá ku awa shushi ta yega einan? E plan a keda ehekutá por kompleto kaba?
4. Minister por informá nos kiko e status di e proyekto aki ta.
5. Kiko mas mester sosodé pa e parke por funshoná optimal?
6. Minister por informá nos di e status di parke Mangrove 2 na otro banda di e hotèl?
7. Minister por informá nos di e status di e Marina na Zakitó i ki influensia esaki lo por tin riba e totalidat mirando ku einan tambe tin un problema di awa shushi i sangura?

 

Nos ta gradisí minister di antemano pa presentá na e vragenuur aki.

 

Atentamente

 

Zita Jesus Leito MBA

Miembro di Parlamento, Partido Alternativa Real