Minister Pisas huntu ku ekspertonan a sambuyá den área di Rif pa personalmente tuma nota di malesa di koral (SCTLD)

Minister Pisas huntu ku ekspertonan a sambuyá den área di Rif pa personalmente tuma nota di malesa di koral (SCTLD)

Willemstad – Resientemente Minister di Asuntunan General, enkargá ku Medio Ambiente i Naturalesa, Minister Gilmar Pisas huntu ku eksperto prof. dr. Mark Vermeij di Universidat di Amsterdam (UvA) i kolaboradó di Ministerio di GMN señor Faisal Dilrosun a sambuyá den área di Rif pa Minister Pisas personalmente tuma nota di e malesa di koral. Señor Faisal Dilrosun (GMN) ta enkargá ku kordinashon pa atendé ku e malesa di koral i aspektonan ekológiko.

Mirando e importansia di nos koralnan komo habitat di piskánan ku nos ta kome i e aspekto di atrakshon turístiko ta di sumo importansia pa nos aktua rápido i diligente. Bou di guia di Minister Pisas ya a hasi e investigashonnan nesesario i Ministerio di GMN ya ta den proseso pa atkerí e remedi Amoxicilline kual ta un tipo di antibiótika ku ta nesesario pa kombatí e malesa di koral. Ta trata aki di un enfermedat di pèrdida di tehido (Stony Coral Tissue Loss Disease) ku a keda deskubrí resientemente na Kòrsou.

Koralnan den region di Karibe ta konfrontá diferente menasa manera e enfermedat aki di pèrdida di tehido kual Minister Pisas mes por a tuma nota di dje. Momentu ku e remedi ta na disposishon lo implementá un struktura kaminda den kooperashon ku operadónan di buseo lo apliká e remedi riba mas tantu koral ku ta posibel. Ya por a mira kaba resultadonan positivo di esaki na vários pais. Esaki ta duna nos speransa ku nos lo por dominá ekspanshon di e malesa aki i asina salba gran parti di nos koralnan.

Riba potrèt por mira momentu ku Minister Presidènt Gilmar Pisas i prof. dr. Mark Vermeij ta hasiendo preparashonnan promé ku sambuyá, tambe potrèt durante sambuyamentu i momentu ku ta sali for di laman.
Riba FB di GMN, Ministry of HealthCuracao, por mira mas potrèt i filmashon di e aktividat aki.