Digital Kids Camp, un eksito grandi!!

Willemstad, Kòrsou – 17 di yüli 2023 –

Durante e siman di 10 pa 15 di yüli, a tuma lugá un evento magnífiko na Kòrsou: Digital Kids Camp 2023. E kampamentu aki, ku tabatin komo meta pa promové kreatividat digital entre mucha i hobennan di nos isla, a resultá un éksito imenso.

Alrededor di 100 mucha, entre edatnan di 7 te ku 20 aña, a partisipá na e kampamentu DKC. Durante un siman largu, e muchanan a risibí diferente workshòp, pa halsa nan abilidatnan den teknologia digital manera coding i desaroyo di wega di kòmpüter i programá nan propio wèpsaitnan. Banda di esaki nan a partisipá den tayer di diseño di poster i wèpsait, fotografia, konstrukshon di robòtnan di palu i proyektonan di Lego. Tambe tabatin lèsnan di produkshon di pelíkula, kompetensha di kore robòt, bulamentu di drone i 3D modeling i printing.

Durante e siman, a keda klá ku hobennan di Kòrsou tin hopi talento den ámbito digital. Nan a demostrá nan abilidatnan kreativo i nan pashon pa teknologia. E resultadonan di nan trabou tabata sorprendente i inspirativo. A eksponé nan trabou i kreatividat den un eksposishon grandi yamá, Digital Fest, kaminda tur mayor i esnan presente por a atmirá e esfuersonan i logronan di e muchanan. Tambe nan por a bula drone i kore robot i asina eksperimentá untiki ku tur loke e muchanan e eksperenshá. Na e festival aki tambe a otrogá sertifikado na tur partisipante i premionan na esnan ku a sobresalí.

Digital Kids Camp ta un inisiativa di Bright Club Foundation ku tin e ophetivo pa stimulá i prepará e hubentut di Kòrsou pa eksplorá i desaroyá nan abilidatnan digital. Segun e fundador di e fundashon sr. R. Welvaart, hopi mucha ta limitá na siña solamente loke ta duna na skol. Pa sera e gèp aki, Bright Club ta brinda materianan ku tin e enfoke riba e tereno di teknologia i siensia.

E tim di DKC ta yama danki na tur mayor pa sostené nan yu den e pashon ku nan tin i ta konfiá ku huntu nan lo sigui traha pa hasi un impakto positivo den desaroyo di nos hobennan. Pa mas informashon tokante Bright Club por subi www.brightclub.info.