Minister Shalten Hato: MINISTER PRONTO LO LANSA KAMPAÑA “MAS BLOU, BAN PROTEHÁ KÒRSOU”
Minister Shalten Hato
MINISTER PRONTO LO LANSA KAMPAÑA “MAS BLOU, BAN PROTEHÁ KÒRSOU”
WILLEMSTAD,- Pa alsa e sentido di seguridat den komunidat, Minister di Hustisia mr. Shalten Hato komo e titular enkargá pa garantisá òrdu públiko i seguridat di pais, pronto lo lansa e kampaña, “Mas Blou, Ban Protehá Kòrsou”.
Minister Hato siman pasá a reuní primeramente ku e tim di maneho di Kuerpo Polisial Korsou (KPC). Durante e reunión aki a papia di e kampaña pa reklutá siudadanonan pa e funshonnan komo agente polisial ku lo habri na ougùstùs próksimo den KPC. E kampaña lo karga e nòmber “Mas Blou, Ban Protehá Kòrsou”.
Tambe presidente di e grupo di tarea i alabes direktor di e sektor di Mantenshon di Lei i Órden Públiko i Seguridat a duna un splikashon di e konsepto di lei ku ta trata e posishon hurídiko di e personal den KPC i a indiká kua ta e artíkulonan den e konsepto di lei ku lo tin ku kaba atendé ainda.
Tambe minister a deliberá ku e tim di maneho di KPC tokante e relashon entre KPC i ORV pa loke ta trata personal i tambe material ku a kumpra i ku e distribuidor internashonal mester kaba kumpli kuné, pa asina sigui ekipá KPC. Tambe a deliberá ku e komishon enkuanto e maneho di protekshon di e personal i por último tambe ku e komishon ku a kuminsa atendé ku diferente petishon ku e personal den KPC a hasi i ku ta pendiente pa atendé.
E komishon ku ta atendé diferente petishon di e personal den KPC a inventarisá tur petishon i a kuminsa trata esakinan. E komishon a konstatá ku tin diferente persona ku no ta nombrá den un funshon, no a risibí un kontesta riba un petishon pa promoshon òf ta wardando ehekushon di desishon riba nan posishon hurídiko. E komishon ta konsisití di entre otro konseheronan hurídiko di minister di hustisia i tambe konseheronan finansiero i profeshonalnan riba tereno di rekurso humano.
