Minister Silvania ta kontinuá dialogo ku generashon nobo di spesialistanan mediko tokante LNT

Willemstad – Ayera, dia 21 di ougùstùs 2023, a tuma lugá kontinuashon di dialogo entre Minister di Salú, Medio Ambiente i Naturalesa (GMN), Sr. Silvania, i representantenan di e spesialistanan mediko ku ta traha na Curaçao Medical Center (CMC), uni bou di e Komishon Bon Servisio (KBS). E komishon aki, ku a risibí mandato for di spesialistanan di CMC, lo sigi dialogá ku Minister Silvania tokante diferente tema relata na salubridat, ku énfasis riba e Landverordening Normering Topinkomens (LNT).

Durante e dialogo, ku a tuma lugá den un ambiente di kolaborashon i interkambio konstruktivo, tantu e minister komo e representantenan di KBS a kompartí varios pensamentu i a interkambia diferente perspektiva, ku e meta pa yega huntu na solushonnan efektivo. A trata entre otro e retonan aktual relashoná ku LNT i e posibilidatnan ku tin den LNT pa solusioná esakinan. Tambe a eksplorá ideanan pa hasi uso di estímulo fiskal komo medio pa atraé i retene spesialistanan ku a gradua resientemente pa traha den CMC.

Minister Silvania a kumplimentá e involvimentu aktivo i mentalidat habrí di e generashon nobo di spesialistanan mediko. ” Ta alentador pa mira ku e spesialistanan hoben ta partisipá i kontribuí na temanan esensial pa salubridat. Esaki ta e bientu fresku ku komunidat ta tin mester di dje”, Minister Silvania a subrayá. E komishon ta determiná pa yega hunto na un solushon relashoná ku LNT i tambe ta deseá pa kontribuí na e restrukturashon di kuido di salú. Ambos parti ta enfoká riba e importansia di tin kuido di salú aksesibel pa tur hende i pa fòrtifiká e konfiansa i imágen di e spesialistanan mediko den komunidat.

E dialogo konstruktivo aki ta marka komienso di un serie di konsulta entre Minister Silvania i KBS. Huntu nan lo trata di yega na solushonnan duradero ku ta yuda hiba e kuido di salú na Kòrsou na un nivel mas haltu. “Laga komunidat tur disfruta di e bientu fresku ku nos ta bendishoná ku ne. Nos kurason ta bati pa Kòrsou!”