Ministerio di GMN a inisiá trayekto di informashon relashoná ku Pèrmit di Molèster

Ministerio di GMN a inisiá trayekto di informashon relashoná ku Pèrmit di Molèster

Willemstad – Momentu ku un persona ta bai habri un negoshi e tin ku hasi petishon di diferente pèrmit na diferente ministerio. Un di e pèrmitnan aki ta e Pèrmit di Molèster (Hindervergunning) kual ta keda otorgá pa Ministerio di Salubridat, Medio Ambiente i Naturalesa (GMN). Pèrmit di Molèster ta obligatorio pa tur aktividat ku tin konsekuensha pa medio ambiente. Pues, konsekuensha pa kontaminashon di tera, awa, airu, pero tambe aspektonan di salú públiko manera molèster relashoná ku zonido i mal holó. Meta di e Pèrmit di Molèster ta pa redusí impakto ambiental i salbaguardiá salú públiko.

Ministerio di GMN a inisiá un trayekto kaminda ta bai informá diferente sektor tokante e Pèrmit di Molèster i dikon mester hasi petishon pa esaki. Na e okashon aki a organisá  un enkuentro ku sektor di horeca di Punda den sala di reunion di Kamara di Komersio. Pa Ministerio di GMN señor Stokkermans a duna splikashon di e kontenido i eksigensianan pa hasi petishon pa e pèrmit, señor Cordilia di Obranan Públiko a duna informashon kon atendé ku awa di residuo, señor Wilson di Brantwer a duna informashon relashoná ku pèrmit di konstrukshon i señor Gijsbertha di MEO a informá tokante e diferente pèrmitnan ekonómiko ku MEO ta otorgá.

E enkuentro aki ku sektor di horeca di Punda ta e promé enkuentro ku e departamentu enkargá ku Pèrmit di Molèster di Ministerio di GMN a organisá. Lo sigui organisá mas enkuentro ku sektornan spesífiko pa logra ku tur kompania ta kumpli ku e eksigensia importante aki. Meta final ta pa yega na un situashon kaminda tur aktividat komersial ekonómiko òf aktividat ku tin konsekuensha pa medio ambiente, tin tur e pèrmitnan ofisial nesesario ku ta rekerí pa e establesimentu por funshoná. Ministerio di Salubridat, Medio Ambiente i Naturalesa lo sigui informá komunidat di e trayekto importante aki.