ENTRANTE 1 DI SÈPTÈMBER EMPLEADONAN DI CRU TA DRENTA DEN SERVISIO PA TEMPU INDEFINÍ

ENTRANTE 1 DI SÈPTÈMBER EMPLEADONAN DI CRU TA DRENTA DEN SERVISIO PA TEMPU INDEFINÍ

Willemstad 3 di sèptèmber 2023 – Curaçao Refinery Utilities (CRU) resientemente, komo parti di esfuerso pa re-aktivá nos fasilidatnan petrolero, a ofresé un akuerdo di empleo ilimitá na su 262 empleadonan for di 1 di sèptèmber 2023. E akuerdo aki ta na inisio di e promé fase di oumento di e aktividatnan riba refineria.  Enfoke prinsipal den e fase aki ta, pa banda di e servisionan ku ta duna Curoil pa importá i warda produktonan di petroli, duna servisio di mantenshon i operashon di e plantanan di asfalt na e kompania GOMG. Asina ya a kuminsá, i e próksimo periodo lo tin basta trabou pa drecha i prepará pa un ‘safe start’ di e trein di produkshon di asfalt, mièntras ku Refineria di Kòrsou (RdK) ta sigui ku e buskeda pa un operadó pa e sobrá fasilidatnan petrolero na Emmastad i Bullenbaai.

E akuerdo ta inkluí un mehoria di kondishonnan sekundario di trabou pa asina gradualmente sera e espasio ku tin ku e kondishonan laboral di sobrá kompanianan den sektor energétiko di Kòrsou. E akuerdo ku ta pa tempu indefiní ta suprayá e importansha ku CRU ta duna na su empleadonan den e esfuerso pa pone nos industria petrolero bèk riba pia na un manera responsabel.