SOAW a organisá ‘Youth Forum 2023’ titulá ‘Ban yuda otro mas’. 

SOAW a organisá ‘Youth Forum 2023’ titulá ‘Ban yuda otro mas’.

Willemstad – Salú mental di nos hóbennan tabata sentral durante e Youth Forum 2023’ ku ministerio di Desaroyo Sosial, Labor i Bienestar (SOAW) a organisá den Sambil. Durante e foro titulá ‘Ban kuida otro mas’, varios hóben a interkambiá di pensamentu i sintimentu ku shete parlamentario i minister Rutmilda ‘Mimi’ Larmonie-Cecilia.

Segun artíkulo 12 di tratado internashonal di derechi di mucha, tur mucha tin derechi di duna su opinion. Ku e artíkulo akí den mente e sektor di Famia i Hubentut di SOAW a organisá e foro pa hóbennan den kuadro di dia internashonal di hóben ku tabata 12 di ougùstùs último.

Durante un periodo di 2 siman, 19 hóben a trein kon pa debatí i argumentá. Huntu e hóbennan a yega na algun tema ku mas nan ta sintá kuné. Di e temannan aki e sinkunan ku mas a bin dilanti a keda skohé pa bai e foro kuné. E punto di salida tabata e salú mental di nos hóbennan.

Temanan ku e keda tratá ta falta di atenshon, pobresa, tabú, relashon di/ku mayor i media sosial. Durante e enkuentro tantu e hóbennan komo mandatarionan a interkambiá ku otro pa yega na puntonan di akshon.

Ku regularidat ta forma inisiativanan di leinan pa komunidat, pero ta lubida o ekskluí partisipashon di hóbennan den e proseso. Ku e intenso pa hasi e kontakto entre Parlamentu i hóbennan mas fásil, a tene e kombersashon ku diferente parlamentario. Pa via di kombersashonnan ke logra si por bin ku inisiativanan di lei kaminda ta tene kuenta tambe ku deseo i nesesidat di e hóben.

Meta di e foror tabata tambe, pa traha riba ‘partisipashon di hóbennan’ kaminda nan mes ta pensa i organisá proyektonan ku ta di nan interes i na nan bienestar. Despues di a yega na e sinku temanan e hóbennan e keda repartí den grupo i a profundisá mas, trahando riba nan argumentonan i planifiká nan strategia.

Despues di apertura di minister Rutmilda Larmonie-Cecilia, kada kabesante di grupo a duna nan presentashon pa splika nan tema i dikon ta importante pa traha riba e problema i posibel solushonnan. A sigui e kombersashon di e parlamentarionan i minister serka kada grupo. Kada 15 minüt e mandatarionan tabata pasa na un otro grupo di hóben pa skucha i interkambiá riba e siguiente tema. Abase di e interes i konekshon ku e temanan, por a nota mesora ku 15 minüt no tabata sufisiente pa interkambiá ku otro. E hóbennan tabata hopi entusiasmá i ku seriedat a splika nan ponensia i keda kontentu ku a skucha nan opinion.

E siguiente paso ta  ku e hóbennan lo bini bèk huntu pa analisá loke a bin dilanti durante di e foro, kompilá esakinan den un dokumento pa entregá na Parlamentu di Kòrsou. Ku entrega di e dokumentu e hóbennan ke dal e siguiente paso pa yega na posibel inisiativanan di lei ku lo ser entregá basá riba e temanan tratá. Di e forma ei  ta garantisá kontiniudat, ademas palabrashonnan lo keda

será, ku tantu parlamentario i ministernan, pa den futuro hóbennan sigui trese nan pensamentunan i ideanan dilanti.

Lo instalá un plataforma di hóben pa yuda garantisá ku e hóbennan lo keda ku “bos” serka nos mandatarionan. Di e forma akí ministerio di SOAW ta komprometé pa duna kontenido na inklushon i duna bida na artíkulo 12 pa kada mucha i hóben haña un plataforma pa papia i ser skuchá.