KAMPIONATO ANUAL DI DEBATE HUBENIL: ROAD TO BUILDING BRIDGES
KAMPIONATO ANUAL DI DEBATE HUBENIL: ROAD TO BUILDING BRIDGES
WILLEMSTAD – Pa promé biaha a tuma lugá e kampionato di debate hubenil, organisá pa Debat.Ed, den wikènt último. E ekipo Wij Zijn Trots di St. Jozef VSBO a titulá kampion di e promé edishon di e torneo Road to Building Bridges.
Debate Education Foundation mihó konosí komo Debat.Ed tin komo meta pa fomentá debate na tur nivel i pa tur edat. Banda di brinda training i krea un klup di debate pa hóben i adulto, a krea un kolaborashon ku fundashon di debate na Hulanda, DebatUnie, pa asina organisá un kampionato di debate anual.
Djasabra último a organisá e promé kampionato di debate hubenil pa skolnan sekundario na ICUC. Kuater tim di Radulphus College i St. Jozef VSBO a partisipá na un total di sinku debate den tres ronda. E timnan a debati riba e ponensianan: ‘Mayornan mester por prohibí akseso na nan yunan su telefòn’, ‘Enseñansa mester pèrmití studiantenan hasi uzo di inteligensha artifisial (AI) pa ku nan lèsnan’, i ‘Gobièrnu mester enfoká su rekurso i esfuerso riba energia renobabel, enbes di habri refineria bèk’.
Alfinal e tim di ‘Wij zijn Toekomst’ ku ta konsistí di Allihah Eugenia, Jully- Ann Simon, Cynobia Castanera i Shekinah Maxi Mejia a sali ganadó den e último kontienda i ‘Dreamers’ ku ta konsistí di Keona van der Veen, Jamie Chang, Maelynn Tjong Ayong i Sandy Zhao a keda na di dos lugá. Premionan di mihó oradó a bai pa Maelynn Tjong Ayong siguí pa un empate na di dos lugá ku Shekinah Maxi Mejia i Christephor Da Silva De Goes.
E timnan ku a partisipá na e torneo aki ta klasifiká mesora pa partisipá na e interkambio internashonal di debate hubenil na òktober próksimo. Dianan 7-15 di òktober, lo tin un kampionato di debate hubenil titulá “Building Bridges’ ku partisipantenan di paisnan Aruba, Boneiru, Sürnam i Kòrsou. Durante e torneo e hóbennan lo representá Kòrsou kontra e otro paisnan. Esaki tambe lo ta promé edishon di e kampionato di debate ku lo tuma lugá anual na e diferente paisnan.
Un danki na ICUC ku nos a hasi uzo di nan lokalidat i nos spònsornan: Fundashon Negoshi Pikiña i Six & Ten Productions. Si bo ke mas informashon di Debat.Ed por sigui nos riba Facebook i Instagram i chèk kon abo tambe por kuminsá praktika debate den seno sosial òf di kompetensia.
