PROME MINISTER TA FELICITA SEÑOR LEO VROLIJK CU E DI 17 EDICION DI E EXPOSICION “E LENS DI MI WOWONAN”

Prome Minister Evelyn Wever-Croes:

PROME MINISTER TA FELICITA SEÑOR LEO VROLIJK CU E DI 17 EDICION DI E EXPOSICION “E LENS DI MI WOWONAN”

ORANJESTAD – Manera ta conoci, tur aña riba Dia di Prensa, señor Leo Vrolijk ta organisa un exposicion, “E Lens di Mi Wowonan”, pa honra miembronan di prensa. Prome Minister Evelyn Wever-Croes tabata tin e honor di atende e apretura di e exposicion aki, diabierna ultimo na Biblioteca Nacional, na unda e la tuma e oportunidad pa gradici señor Vrolijk pa un biaha mas organisa un bunita exposicion.  Apesar di ta pasando den momentonan hopi dificil, señor Leo Vrolijk a duna tur di su mes pa logra bin cu e exposicion aki, poniendo tambe, un dedicatorio na su yiu cu di ayariba ta mande e forsa necesario pa sigui.

Prome Minister ta extende un invitacion na e comunidad di Aruba, pa pasa na Biblioteca Nacional pa asina aprecia e exposicion aki, cu ta ilustra potretnan recien y di hopi tempo pasa. Loke ta mas impresionante ta e storia cu tin tras di tur e potretnan, cu pa nos hobennan ta bira un historia, importante pa conoce.  “Mi ta felicita señor Leo Vrolijk cu su di 17 edicion di e exposicion ” E Lens Di mi Wowonan”, y ta desea su persona hopi forsa pa por continua cu esaki pa hopi aña mas” Prome Minister a expresa.