MEO TA INISIÁ UN INVESTIGASHON DI BENTA I PREIS DI PISKA

Minister ke sigurá akseso na kompra di piska na un preis hustu

Willemstad – Den su afan pa yega na preis hustu, Minister di Desaroyo Ekonómiko, señor
Ruisandro Cijntje, a enkargá Ministerio di Desaroyo Ekonómiko (MEO) pa hasi un “nulmeting” riba benta di piská na Kòrsou.

E siman akí mes, inspektornan di MEO lo inisiá ku bishita na tur e diferente bendedónan di piská den e kadena di oferta di piská pa inventarisá diferente data importante. Entre otro lo registrá frekuensia di benta di tipo di piská, si e ta wòrdu ofresé riba eis òf kongelá i tambe e preis ku e piská ta wòrdu ofresé na e diferente kumpradónan.

E meta prinsipal ta pa por determiná si tin ku regulá preis di piská i si ta sí, kua tipo di piská i den ki kondishon. Den komienso di añanan 80 ta último biaha ku preis di piská a wòrdu regulá i despues esaki no a ser bibá mas. Den un eventual regulashon di preis di piská lo tene kuenta ku interes di tur esnan enbolbí den e kadena di benta di piská pero spesialmente ku e interes di e konsumidó pa asina subi akseso na konsumo di piská.

Minister di Desaroyo Ekonómiko, mediante di e komunikado aki, ta pidi koperashon di tur esnan enbolbí den kadena di bentadi piská pa por realisá e investigashon aki mas lihé posibel na bienestar di un i tur.