Ki ehersisio gobièrnu den e kaso aki Minister di Desaroyo Ekonómiko sr. Cijntje ta   hasiendo pa asina por yega na un mihó preis di komestibel pa pueblo di Kòrsou

Presidente di Parlamento di Kòrsou

Señora Ch. America-Francisca

Wilhelminaplein # 4

PRESENTE

 

Willemstad, 18 di sèptèmber 2023

 

Tópiko: Petishon pa dirigí pregunta na Minister di desaroyo Ekonómiko

 

Señora America-Francisca,

 

Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di desaroyo ekonómiko señor Ruisandro Cijntje

 

Danki pa e koperashon.

 

Atentamente,

 

 

 

 

David Seferina

Parlamentario pa

frakshon di MFK

 

 

 

 

Minister di Desaroyo Ekonómiko

Señor Ruisandro Cijntje
PRESENTE

Kòrsou, 18 di sèptèmber 2023

Tópiko:  Ki ehersisio gobièrnu den e kaso aki Minister di Desaroyo Ekonómiko sr. Cijntje ta   hasiendo pa asina por yega na un mihó preis di komestibel pa pueblo di Kòrsou

 

Señor Ruisandro Cijntje,

 

 

Miembro di parlamento pa frakshon di Movementu Futuro Kòrsou ( MFK) ,  David Seferina a tuma nota ku dia pa dia preis nan di komestibel ta subiendo drástikamente i ku ta birando kasi imposibel pa pueblo por sigui karga ku esaki.

Frakshon di MFK a tuma nota tambe ku Minister enkargá ku Ministerio Desaroyo Ekonómiko Minister Cijntje ta kanando un trayekto kaminda lo bai introdusí e makutu básiko “smart kart” ku lo bai keda usa pa komestibel i produktonan di promé nesesidat na esnan di ménos rekurso lokual ta di aploudí.

Suskrito a bin komprondé di Minister Cijntje ku e lo bai laga hasi investigashon riba preis di benta di piska pa asina pueblo di Kòrsou tambe por paga un preis hustu i pagabel pa kilo di piska.

P’esei pa medio di e karta aki i hasiendo uso di artíkulo 96 di Reglamentu di órden di Parlamento, suskrito kier hasi e siguiente preguntanan na Minister di Desaroyo Ekonómiko señor Ruisandro Cijntje

1. Pa ki tempu minister Cijnte ta ferwagt e makutu básiko “smart kart” lo keda introdusí?
2. Ta ken ta bai keda enkargá ku investigashonnan riba preis di benta di piska?
3. Por garantisá e kalidat di komestibel i kon ta bai garantisá esaki?
4. Ken ta bai keda responsabel pa kalidat di komestibel?
5. Lo bai bin un òf otro instansia pa e konsumidó por hasi reklamo riba kalidat di produkto?
6. Por duna e kliente siguransa ku e kalidat di komestibel ta aseptabel i un preis hustu i pagabel?
7. ki punto di salida minister tin pa preis “range” pa kilo di piska ku minister kier bai laga hasi un investigashon riba preis di piska?

 

 

 

Rekordando bo persona na e obligashon den nos areglo di estado pa duna miembronan di parlamento tur informashon rekerí i na e obligashon den e protokòl firma entre parlamento i gobièrnu pa duna e informashon aki no mas tarda ku denter di (2) luna, frakshon di MFK ta keda en espera di bo kontesta.

 

 

Atentamente,

 

 

 

 

David Seferina

Miembro di parlamento pa

frakshon di MFK