Pregunta na Minister di Hustisia sr S Hato pa duna klaridat riba: Kon gabinete Pisas ta evitá trafikashon i trata di mucha !
Willemstad, 24 sèptèmber 2023
Tópiko: Pregunta na Minister di Hustisia sr S Hato pa duna klaridat riba: Kon gabinete Pisas ta evitá trafikashon i trata di mucha !
Honorabel sra. America-Francisca,
Señora presidente, pa medio di e karta aki suskrito ke hasi uso di artíkulo 96 di Reglamentu di Òrdu i ta pidi enkaresidamente pa bo persona por dirigí e karta aki ku e tópiko: ‘Kon gabinete Pisas ta evitá trafikashon i trata di mucha!’, na Minister di Hustisia sr S Hato
Atentamente,
Ana Maria Pauletta
Frakshon di PAR
Na: Minister di Hustisia
Sr. S. Hato
Wilheminaplein z/n
Presente
Willemstad, 24 sèptèmber 2023
Tópiko: Kon gabinete Pisas ta evitá trafikashon i trata di mucha!
Honorabel sr. Hato,
Frakshon di PAR a tuma nota ku durante último simannan personal di Guarda Kosta i KPC a registrá diferente lancha ku a drenta nos pais di forma ilegal. Riba e lanchanan aki, banda di droga i arma a bin ta topa ku regularidat menornan di edat.
Resientemente por a tuma nota ku un mucha di 5 aña tabata riba un di e botonan aki i ku e lancha aki tambe tabatin tin droga riba dje. Djaluna 18 di sèptèmber a interseptá, 1 lancha mas ku 5 mucha riba dje.
Esaki ta un desaroyo di preokupashon, spesialmente mirando kasonan di ‘trafikashon i trata di mucha’ ta lantando kabes na diferente parti di mundu. Retnan ku ta saka muchanan for di nan pais di orígen ku meta di prostitushon i/of trabounan ilegal.
Tráfiko di hende ta kontra tratadonan di derecho humano i kastigabel pa nos leinan. Gobièrnu mester hasi tur posibel pa evitá ku Kòrsou ta keda usá pa tipo di práktikanan asina aki. Na aña 2021, Kòrsou a keda devaluá na TIER 3, di TIP-Report. Esaki ta pone ku komo pais, mester bai pone muchu mas atenshon na trafikashon di hende i e maneho ku Kòrsou ta hiba pa prevení esaki.
Den kuadro di esaki suskrito tin algun pregunta:
1.Kua ta e maneho ku Gobièrnu ta hiba na momento ku un menor di edat drenta nos pais di forma ilegal, tantu pa medio di laman komo aire?
- Kua ta e prosedurá, ku Gobièrnu ta hiba pa konfirmá e identidat di e mucha/hóben?
Tin prosedura ku por detektá ku en realidat e mucha ta yu di e persona ku ta indiká di ta su mama òf su tata? Ta investigá ku si realmente e mama òf tata tin tambe kustodia di e mucha /hóben ?
- Kon e refugio (opvang) di e mucha/hóben aki ta keda reglá ? Kua ta e instansianan indiká pa Gobièrnu pa atendé ku refugio i investigashon pa protekshon di e mucha i hóben ? (e preguntanan aki por keda kontestá den forma di ter inzage, pa protekshon di e mucha i hóbennan).
- Kuantu tempu ta e máksimo tempu ankrá den e maneho ku un mucha/hóben por keda separá di su mayor òf tutor.
- Si detektá kaso di trafikashon di mucha, kua ta e proseduranan ku ta keda enkaminá?
- Minister lo por informá Parlamento durante e último 3 añanan, kuantu investigashon a keda hasi di trafikashon di mucha, kuantu kaso a keda konfirmá i hiba dilanti di korte di Hustisia?
- Den algun di e kasonan resien e muchanan a biaha sin papel ofisial, sin tutor i/òf kustodia reglá, ta ora nan yega Kòrsou e mayornan ku ya kaba ta na Kòrsou a trese e papelnan di e mucha /hóbennan aki. Kua ta prosedura ku ta kana den e kasonan aki ?
- Minister por informá, den último 3 aña, kuantu mucha/hóben ku a drenta di forma ilegal a keda reuní ku nan mayor i a keda Kòrsou ? Kuantu di e kasonan aki ta trata mayor indokumentá, ku ta hiba komo konsekuensia ku e yu tambe a bira indokumentá na Kòrsou?
Danki di antemano pa e kontestanan.
Atentamente,
Ana Maria Pauletta
Frakshon di PAR
