Gobièrnu di Kòrsou a empoderá Promé Minister Gilmar Pisas pa partisipá na e findishi
Willemstad – Gobièrnu di Kòrsou a empoderá Promé Minister sr. Gilmar Pisas pa partisipá na nòmber di pais Kòrsou na e findishi realisá dia 26 sèptèmber 2023.
Durante di e findishi aki 3 parsela riba e terenonan di Cunucu Hatun i Seroe Fortuna formando un (1) propiedat a keda ofresé na benta.
Pa medio di e komunikado aki ta konfirmá ku Gobièrnu di Kòrsou a gana e findishi aki hasiendo un dil di Naf. 8 mion.
Na final di e findishi Ministerio Públiko (OM) a informá mesora ku e propiedat ta keda otorgá na Gobièrnu di Kòrsou.
Den e próksimo simannan lo hasi e trámitenan nesesario pa asina pais Kòrsou por atkerí un propiedat ku un balor signifikante i ku hopi potensial stratégiko.
Gobièrnu di Kòrsou a opta pa hasi e invershon aki mirando ku e riesgonan ta limitá i ku e benefisionan ta mas importante.
Tur konseho solisitá tabata positivo. E propiedat ta brinda oportunidat pa diferente proyekto dependiendo di e maneho ku Gobièrnu di Kòrsou ke implementá, entre otro:
- E propiedat por keda usá komo un sentro kaminda por risibí hendenan den nesesidat pa tratamentu spesífiko;
- E propiedat ta hopi serka di terenonan di aeropuerto i por ser usá pa proyektonan ku ta ligá ku fasilidatnan rondó di aeropuerto;
- E propiedat por fungi komo un establesimentu turístiko;
- E propiedat por fungi komo un sentro multifunshonal;
- E propiedat por sigui mantené e mesun meta ku e tabatin último dékadanan;
- E propiedat por sirbi pa ofresé dak na personanan ku mester di esaki i ò komo shèlter.
Pa por yega na e mihó maneho posibel Gobièrnu di Kòrsou ta bai instituí un komishon miksto, pa asina yega na e mihó estilo di eksplotashon di e propiedat aki ku a bira awor parti di e ‘Domaniale gronden’, pues propiedat di pais Kòrsou, ku un balor di bentá por lo mínimo di Naf. 14 mion.
Por último mester ser bisá ku e invershon di Naf. 8 mion pa atkerí e propiedat aki ta bai direktamente den e fondo pa kombatí kriminalidat, esta ‘Crime fonds’.
Pues di e forma aki e transakshon aki ta sera un sírkulo kaminda ta e bienestar i interes di pais Kòrsou ta na promé lugá.
