PREPARASHONNAN TA KONTINUÁ PA NOS SELEKSHON NASHONAL  ENFRENTÁ PANAMA DJABIÈRNÈ 13 DI ÒKTOBER 2023!  KARCHINAN OPTENIBEL NA DIFERENTE PUNTO RÒNT KÒRSOU!

PREPARASHONNAN TA KONTINUÁ PA NOS SELEKSHON NASHONAL  ENFRENTÁ PANAMA DJABIÈRNÈ 13 DI ÒKTOBER 2023!

 KARCHINAN OPTENIBEL NA DIFERENTE PUNTO RÒNT KÒRSOU!

 

 

Preparashonnan pa nos próksimo partidonan di Nations League 2023 ta kanando den ful swing! Pueblo di Kòrsou kompletu ta keda invitá pa presensiá nos promé partido di Nations League 2023 na kas, ku lo tuma lugá djabièrnè 13 di òktober próksimo, 5’or di atardi den Stadion Ergilio Hato kaminda nos lo enfrentá Panama. FFK a purba pa hasi un kambio na e orario pero lamentablemente esaki no a logra pues nos partido di djabièrnè ta keda 5’or di atardi.

 

Nos hungadónan ya ta na Kòrsou i ta kla pa inisiá ku e preparashonnan pa nos partido di djabièrnè awor kontra Panama pa despues nos topa Trinidad & Tobago djamars 17 di òktober próksimo pa 9’or di anochi den Stadion Ergilio Hato.

 

Manera semper nos tin diferente sekshon, kada ku nan preis i entrada separá pa por ingresá Stadion Ergilio Hato riba dia di wega. Portanan ta habrí for di 3’or di atardi, pues yega trempan pa evitá stagnashon na porta.

 

Entrada pa e partido entre nos selekshon i Panama pa e tribunanan kubrí ta kosta fl.50 pa adulto miéntras mucha di 6 pa 12 aña i 60+ ta paga fl.25,-. Preis pa e áreanan patras di gol ku no ta kubrí ta kosta fl.25,- pa adulto miéntras mucha di 6 pa 12 aña i 60+ ta kosta fl. 10,-

 

Komo nos ta den temporada di vakashon nos a bin ku ‘special’ pa tur nos mucha i hóbennan.

Tur mucha i hóben te ku 15 aña ku presentá na porta ku un suèter blou bistí, por drenta pòrnada. Kòrda ku e hóbennan mester presentá ku un ID bálido pa por identifiká nan mes.

 

Karchinan ta optenibel na siguiente puntonan di benta;

 

• Ofisina di FFK (9am-7pm) tene kuenta ku riba 10 di òktober ofisina ta será.
• Pòmp di gasolin Sta Maria
• Botika Mampuritu
• 4th of July snèk

 

E ora 0 ta yegando pa bo mira nos selekshon nashonal den akshon kontra Panama aki na Kòrsou riba djabièrnè 13 di òktober próksimo den Stadion Ergilio Hato!

 

Wak pa bo tei…nos selekshon ta konta ku bo!

 

9 òktober 2023