Meteorological Department Curacao: Djasabra awor lo tin eklipse parsial di solo

Djasabra awor, dia 14 di òktober, lo tin un asina yamá eklipse anular di solo, ku na Kòrsou sin embargo solamente lo ta visibel komo un eklipse parsial di solo. Den e kaso aki kasi 61% di solo lo ser kubrí dor di luna na e punto kulminante di e eklipse aki.

Un eklipse anular ta sosodé ora luna krusa mei mei di solo i mundu i asina blokia e bista di olo sea total of parsial. E último biaha ku nos por a eksperensia esaki na Kòrsou tabata na 1998.

Dia 26 di febrüari 1998, pueblo i e hopi bishitantenan a eksperensiá un eklipse total di solo. Esaki ta algu ku mayoria hende por eksperensiá solamente un biaha den nan bida, si nan tin suerte. E dia ei a kuminsá hopi nublá, pero banda di 12’or di mèrdia, kasi tur nubia a disparsé i Kòrsou por a kuminsá prepará p’e momentu ku luna lo a kuminsá tapa solo. E kuminsamentu di e parti parsial di e eklipse ei a sosodé 12:40 i gradualmente mas i mas di solo tabata ser tapá dor di luna. E punto kulminante di e eklipse total aki a yega 14:12 i a dura mas ku dos minüt i mei na Watamula i bisindario. Mas pariba, e durashon di e totalidat tabata mas kòrtiku. Ora ku solo a kuminsá aparesé atrobe despues di 14:14, tur hende mester a kuri bisti e brelnan spesial pa eklipse di solo bèk, pa asina protehá nan wowonan kontra di e rayonan fuerte i potensialmente peligroso di solo. Mas ku un ora despues, 15:37 solo tabata bria manera kustumber atrobe i asina a yega a yega un fin na un fenómeno tremendo, ku kasi tur hende lo keda kòrda pa sobrá di nan bida.

Djasabra awor di 14 di òktober, e eklipse lo kuminsá mèrdia 12:47 aki na Kòrsou i lo yega su punto máksimo 14:30’or (mitar di tres). Na e momento ei kasi 61% di solo lo ser kubrí dor di luna. E fenómeno aki lo kaba 16:05’or, esta sinku pasá di kuater di atardi.

Seguridat ta sumamente importante na e evento! E eklipse solar parsial ta un espektakular asombroso, pero sumamente peligroso pa mira direktamente. Ta supliká pa tur hende ku kier mira e eklipse solar parsial pa bisti solamente brelnan ISO sertifiká spesialmente diseñá pa mira eventonan asina. Tambe ta rekomendá pa reemplaso brelnan bieu uza den pasado.