Elekshonnan di Karnaval 2024 organisá pa FDKK huntu ku
Krea Dansa i TaskForce Embahadornan di Karnaval

Fundashon Desaroyo Karnaval Korsou (FDKK) ta keda kere ku e formula pa un Karnaval eksitoso ta ora
nos hasi’é konhuntamente. Den kuadro di elekshon di nos embahadornan pa e marchanan di Karnaval
2024 a habri oportunidad pa organisashonnan por a entrega nan petishon pa bini na remarke pa huntu
ku FDKK organisá e eventonan konserní.
En total a risibí seis petishon. Kada un di e organisashonnan a haña oportunidat pa a duna un
presentashon personal na direktiva di FDKK. Durante esaki e organisashon por a amplia riba diferente
punto di importansia manera entre otro su vishon pa ku preparashon di e partisipantenan i tambe e
aspekto finansiero den su totalidat.
Pa organisá huntu ku FDKK e elekshon pa nos hobennan di rei I reina a wòrdu selekshoná Krea Dansa,
presidí pa Dennis Puriel. E organisashon aki ta konsistí di diferente persona ku hopi eksperensia
trahando ku hoben riba e aria edukashonal i alabes e parti di kreatividat i ekspreshon. FDKK ta kere
firmemente ku Krea Dansa lo por kontribuí pa atraé mas partisipante pa e elekshonnan i alabes pa e
marcha di hoben dor di mas partisipashon di skolnan sekundario na esaki.
Pa e elekshonnan di mucha i hende grandi a wòrdu selekshoná TaskForce Embahadornan di Karnaval,
presidí pa Carlton Jansen. Igual ku Krea Dansa, e organisashon ta konsistí di personannan vèrsá riba
diferente aria relevante den kuadro di organisá elekshonnan di e índole aki.
FDKK huntu ku e organisashonnan Krea Dansa i TaskForce Embahadornan di Karnaval lo pèrkúra pa tres
elekshon espektakular ku kontenido manera Korsou meresé.
Si bo ke partisipá na un di e tres elekshonnan aki bo por manda un email na elekshon@FDKK.net