Gobièrnu a pega barku den kaso di fiansanan di Ennia i Covid

Ku hopi asombro Partido Inovashon Nashonal (PIN) a tuma nota di un karta di Gobièrnu di Kòrsou, fechá 10 di òktober 2023, dirigí na Parlamento di Korsou. Depues di a ninga retundamente pa bai parlamento, awor gobièrnu ta kai na rudia i pidi parlamento pa intervení na favor di gobièrnu durante di enkuentro entre e parlamentonan den Reino (IPKO). Lokual ta asombrá PIN ta, ku gobièrnu solamente ta deskribí un proseso di negosashon den e karta, ma ketu bai no ta duna ningún informashon di konkretu di e konsekuensianan finansiero di e diferente manera di atendé ku e fiansanan di biones pa pais! Ta una falta total di rèspèt pa e ròl di parlamento i e pueblo ku  parlamento ta representá!

Anteriormente nos a komprondé for di media, ku gobièrnu a ning’a e fiansa di 1,2 miljard florin serka Ulanda pa kubri penshun di penshonadonan di Ennia , después ku e mes a mendigá  p’e serka gobièrnu Hulandes pa e por laga e kompania ‘Ennia leven’ siguí eksistí i awor gobièrnu último ora a skohé pa eliminá e kompania  ‘Ennia Leven’ i kortá den e penshun di e penshonadonan. Gobièrnu a skohé pa laga pueblo paga un total di 30 mion pa aña durante 30 aña, kemen 900 mion sin nunka haña nada bèk di e sèn.  Partido PIN ta pidi parlamento pa atendé e karta ku úrgensia den un reunión públiko. Mester por lo menos klaridat riba lo siguiente.

1. Kiko ta e benifiso pa pueblo ora sera e kompania ‘Ennia Leven’, kompará ku lag’é sigui eksisti? Siendo e último ku lo a nifiká ku e kompania di seguro ta keda na bida, e trahadornan ta keda ku nan trabou i pueblo ta haña su sèn bèk?
2. Kon e dividendo ku CBCS mester paga na gobièrnu pa e próksimo 30 aña ta garantisá?
3. Kiko ta balor di e propiedatnan aktual di Ennia?
4. Kiko ta konkretamente ta e rekorte riba penshun di e penshonadonan di Ennia ora nan yega nan edat di penshun?
5. Kon ta posibel ku Gobiernu ta anunsiá ku lo pone un suma di 30 mion komo gastu riba presupuesto, sin spliká di Lunda ta sake e sèn pa paga e gastu i sin bai parlamento? No ta kontra di Areglo di Estado i di Li di Komptabilidat pa tuma un obligashon finansiero sin bai parlamento promé?
6. Ta bèrdat ku lokual pueblo tin di paga awor pa e fiansa di Covid na 2024 ta 79 mion siendo ku e suma pa tantu e fiansa di Covid plus esun di Ennia huntu lo tabata menos, esta 69 mion?
7. Kiko ta e konsehonan di Ministerio di Finansas i departamento húridiko di gobièrnu riba e diferente proposishonnan pa atendé e sakeo di Ennia?
8. a duna un opinion kaba riba e desishon di gobièrnu usa 30 mion pa aña pa paga penshunnan di penshonadonan di Ennia sin ku nos tah aña e sèn bèk?
9. Dikón ainda gobièrnu mester di 1 luna pa konkretisá su desishon?
10. Kiko ta intenshon di gobièrnu relashoná ku e kaso den Korte di Ennia kontra Ansari c.s.?
11. Parlamento ta haña kopia di e ‘Bestuurlijke Hoofdlijnenakkoord’ i e otro dokumentonan relevante den e kaso aki?
12. Kiko ta e ‘rendimento aktual’ ku Hulanda ta paga riba fiansa ku e tuma, kual interés riba fiansa Kòrsou tin derechi riba dje, basá riba e Rijkswet Financieel Toezicht (art. 16 insiso 7)? Ta basa riba e lei aki gobièrnu ke aktua huridikamente kontra Ulanda?