Petishon pa reunion di Komishon Sentral tokante situashon entre Betesda i Minister di Finansa.
Na: Presidente di Parlamento di Kòrsou
Sra. Ch. America-Francisca
Wilhelminaplein 4
Presente
Willemstad, 12 mart 2024
Tópiko: Petishon pa reunion di Komishon Sentral tokante situashon entre Betesda i Minister di Finansa.
Apresiabel Sra. America-Francisca,
Nos a tuma nota ku minister di Finansa a sali den diferente media i ta eksigiendo responsabilisashon pa e fondonan ku Minister a pone disponibel pa Betesda. E motibu ku Minister di Finansa ta duna ta, ku e direktor lo no a usa e fondonan pa lokual e la duna e fundashon p’e.
Minister a duna di konosé na un radio emisora ku e lo a tende diferente deklarashonnan den media di e direktor, pero ku ainda e no a risibí esakinan por eskrito. E ta algu sumamente pekuliar pa tende esaki di Minister di Finansa ku práktikamente ta komuniká eksklusivamente via di media sosial.
Mirando e funshon ku Betesda tin i e ròl di esaki den nos komunidat, ta importante pa Minister splika e problema spesífiko ku e tin ku e fundashon. P’esei Frakshon di PAR ta haña importante pa yama un reunion di Komishon Sentral riba e tópiko aki.
Pa trese klaridat i un kontesta rápido di tur e bandanan di e situashon, nos ta hasi uso di artíkulo 33 di Reglamento di Órden pa pidi un reunion di Komishon Sentral. Pa e reunion aki parlamento lo ke invitá Minister di Finansa Drs. Javier Silvania, direktora Dr. Natasha Rog, i e hunta di supervishon di Betesda.
Tambe nos lo ke a pidi Minister di Finansa amablemente pa proporshoná parlamento ku un kopia di e karta ku su persona ta referí na dje kaminda e direktora di Betesda lo a pidi retiro pa trahadónan na SOAW, denter di 1 siman despues di e fecha di e petishon aki.
Nos ta spera ku presidente por yama e reunion aki mas pronto posibel pa asina pueblo di Kòrsou i e trahadónan di Betesda por haña klaridat tambe.
Atentamente,
Frakshon di PAR
Steven Croes Quincy Girigorie Ana Maria Pauletta
