NOS SELEKSHON TA KLA PA ENFRENTÁ PANAMA 13 DI ÒKTOBER 2023 5’OR DI ATARDI DEN STADION ERGILIO HATO! E DIA A YEGA!
NOS SELEKSHON TA KLA PA ENFRENTÁ PANAMA 13 DI ÒKTOBER 2023 5’OR DI ATARDI DEN STADION ERGILIO HATO!
E DIA A YEGA
13 di òktober 2023 nos selekshon nashonal lo tin un partido importante nos dilanti!
Nos selekshon lo enfrentá e selekshon di Panama pa 5’or di atardi den Stadion Ergilio Hato durante nos terser partido di Nations League 2023. Un partido determinante pa nos keda den Liga A di Nations League.
Awe nos selekshon ta tin su último seshon di training ku a bai hopi bon. Nos hungadónan ta hopi animá i ta mentalmente ku físikamente bon prepará pa saka nos kara mañan.
Mañan nos lo tin karchinan disponibel na e lokètnan di SDK for di 9’or di mainta te atardi ora di wega. Portanan di stadion ta habri for di 3’or di atardi, pues yega trempan pa evitá stagnashon na porta.
Entrada pa e partido entre nos selekshon i Panama pa e tribunanan kubrí ta kosta fl.50 pa adulto miéntras mucha di 6 pa 12 aña i 60+ ta paga fl.25,-. Preis pa e áreanan patras di gol ku no ta kubrí ta kosta fl.25,- pa adulto miéntras mucha di 6 pa 12 aña i 60+ ta kosta fl. 10,-.
Komo nos ta den temporada di vakashon nos a bin ku ‘special’ pa tur nos mucha i hóbennan.
Tur mucha i hóben te ku 15 aña ku presentá na porta ku un suèter blou bistí, por drenta pòrnada. Kòrda ku e hóbennan mester presentá ku un ID bálido pa por identifiká nan mes.
Tur kos ta kla pa nos selekshon nashonal su promé partido na kas, di Nations League 2023 kontra Panama. Abo so falta ta bin animá i apoyá nos hungadónan durante e wega importante aki…nos ta topa den stadion!
FFK ta deseá nos selekshon tur klase di éksito!
12 òktober 2023
