SIN FRONTERA

Haiku: ‘Blou, hel ku blanku … ta bria riba mapa, djamanta Kòrsou’

WILLEMSTAD – Resientemente srta. Aline Abdul a hasi entrega di su buki titulá: ‘Sin Frontera’ na Minister di Enseñansa, Siensia, Kultura i Deporte (ESKD) sr. Sithree van Heydoorn. E hóben talentoso a skibi e buki, ku ta un kompilashon di vários artíkulo manera: poema, testimonio i haiku na nos idioma papiamentu. E inspirashon di e buki ta basá riba e multi kulturalismo di Kòrsou ku ta un refleho di e diversidat kultural.

Srta. Aline Abdul ta un hóben di 19 aña ku a gana un debate nashonal i a kuminsá su propio organisashon: “In Other Words”pa enkurashá desaroyo di hóben. Aktualmente e ta studiando lei na Universidat di Kòrsou ku e meta pa bira wes. E kombersashon durante di e bishita a bai di forma ameno i srta. Abdul a splika su vishon komo Libanes bibá na Kòrsou. Su raisnan libanes mesklá ku su amor pa Kòrsou a lanta su pashon pa e sosiedat diverso di nos isla. Ku e buki aki e ta pone e promé paso pa lanta un movementu inovativo den nos mundu literario i un spil ku ta reflehá nos realidat.

Den e buki bo ta mira e poder di palabra, búskeda di ekselensia i eterno set di hustisia. Ku e arte poétiko delikado, e hóben ta trese su pensamentunan dilanti. Komo ehèmpel por tuma nota di algun Haiku manera:
i. ‘Blou, hel ku blanku … ta bria riba mapa, djamanta Kòrsou’.
ii. ‘Boka di pòtlot, a plama mi sekreto riba papel’;
iii. ‘Mi man ta kuashi, palabranan ta fèrf, haiku e obra’.
Asina por tuma nota i vários artíkulo inspirativo den e buki.

E buki: ‘Sin Frontera’, a keda finansiá pa editorial Wintertuin i Nederlandse Letterenfonds. Produkshon a keda hasí pa Naomi Engels i redakshon pa Lucille Berry-Haseth, Ange Jessurun i Elvira Bonafacio.

Minister di ESKD sr. Sithree van Heydoorn a felisitá e hóben eskritor srta. Aline Abdul i a yam’é danki pa su buki inspirativo ku ta stimulá nos kada un pa buska nos pashon sin frontera.

Sin Frontera