ARUBA TA DEN PROCESO DI TRANSFORMACION ENERGETICO, CU LO GENERA PROGRESO PA HENTER COMUNIDAD

Minister Glenbert Croes:

Den cuadro di Dia Mundial di Energia

ARUBA TA DEN PROCESO DI TRANSFORMACION ENERGETICO, CU LO GENERA PROGRESO PA HENTER COMUNIDAD

ORANJESTAD – Riba Dia Mundial di Energia, Minister di Energia Glenbert Croes a elabora riba e importancia di transformacion energetico, y riba e diferente pasonan cu Aruba a bin ta tumando pa cu transicion aki. Manera ta conoci, calentamento global ta real y Aruba ta sintiendo e efectonan di esaki. Teniendo e problematica aki den consideracion, Gobierno a cuminsa cu diferente proyecto pa cu transicion energetico pa Aruba tambe contribui y cumpli cu e acuerdo di Paris 2030. E acuerdo aki ta inclui e compromiso di cada Pais pa reduci emisionnan cu ta dañino pa nos medio ambiente pa combati calentamento global.

 

E proyectonan:

Aruba ta expandiendo e parkenan di molina di biento y solar. Aruba ta den proceso cu Acciona Energia pa desaroya un hydrogen valley. Aruba ta invertiendo den un planta di gas, cu e proyecto di Eagle LNG. Y nos ta den proceso cu e bid pa cu Parke Rincon.

 

Minister Croes a indica, cu e proyectonan aki, Aruba ta den total transformacion energetico y cu ta importante pa sigura cu e transformacion aki ta uno cu lo genera progreso pa henter comunidad. Tambe, Gobierno, den e transicion aki ta explorando otro oportunidadnan cu por yuda enrikece pais Aruba den e progreso energetico aki.

 

“P’esey riba dia Mundial di Energia, mi kier resalta, cu Aruba ta un pais chikito, y por ta, cu mundo henter ta pensa cu e pasonan cu Aruba ta tumando ta insignificante, pero ohala cu nos como un isla chikito, cu lo wordo mas afecta cu consecuencianan di calentamento global, por pone cu e pasonan cu nos a tuma, un presion positivo riba mundo henter, pa asina hunto nos haci e diferencia cu lo salba nos planeta. Ban tuma e desafio aki na serio”, Minister Croes a expresa.