Global Entrepreneurship Week Curaçao ku un programa di aktividat amplio i diversifiká
Global Entrepreneurship Week Curaçao ku un programa di aktividat amplio i diversifiká
WILLEMSTAD – Djárason mèrdia e tim organisadó di Global Entrepreneurship Week Curaçao, huntu ku partnernan di GEW Curaçao, a presentá na prensa i invitadonan informashon detayá di aktividatnan ku lo tuma lugá den kuadro di e siman empresarial. E konferensia a tuma lugá den ouditorio di Kámara di Komèrsio. Global Entrepreneurship Week ta tuma lugá na mas ku dosshen pais afiliá Global Entrepreneurship Network (GEN), ku ta e organisashon mama ku sede na Washington , Estádos Unídos. GEN ta stimulá paisnan miembro di GEN pa durante di un siman den luna di Novèmber, stimulá ‘entrepreneurship’ mediante di aktividatnan ku kada pais mes por pensa, prepará i ehekutá. E aktividatnan por ta organisá pa e ‘board’ mes na e pais, pero mas ku tur kos e ‘board’ mester purba na trese mas partner huntu ku por organisá nan propio aktividat. E aña aki e siman ofisial ta kore di 13 pa 19 di Novèmber, pero realidat ta ku e kantidat di partner i aktividat a krese asina tantu ku no por hinka tur den un siman. Ku aprobashon di e organisashon mama, e aña aki tambe amplia e periodo pa mas ku un siman. Asina ei a hinka algun aktividat den loke e board a yama ‘on the road to GEW, i asta tin aktividatnan ku ta tuma lugá e simannan despues di e ‘siman ofisial’ di GEW.
Sra. Elgenia Pieternella, presidente di GEW pa Karibe Hulandes, a splika en general kiko ta Global Entrepreneurship Week i pakiko ta tene esaki. Tambe sra. Pieternella a suprayá e importansia di tin partnernan ku ta duna kontenido na GEW. Tambe e presidente a tira lus riba e diversidat ku a logra ku aporte di e partnernan ku a kere den GEW i ta duna nan aporte pa huntu traha na éksito di GEW.
Un di personanan ku a hiba palabra durante di e konferensia ta e titular enkargá ku e ministerio pa desaroyo ekonómiko i turismo, Minister Ruisandro Cijntje. Minister Cijntje a mustra riba importansia di empresarionan pa desaroyo di ekonomia. Tambe Minister Cijntje mustra riba e echo ku si ta bisa ku e sektor di empresa chikí i mediano ta wesu di lomba di ekonomia, aktividatnan manera e ‘board’di GEW i partnernan ta organisá bou di e paraplü di GEW ta stimulá personanan ku kuminsá ku ke kuminsá un empresa i alabes ta empoderá empresanan eksistente den e trayekto di kresementu di nan empresa. E ministerio pa desaroyo ekonómiko, huntu ku otro ministerionan i otro organisashon, riba djabièrnè dia 17 di Novèmber tin un dia kompleto di seshonnan informativo na Sambil pa empresarionan i otro personanan interesá den informashon.
Representantenan di otro organisashonnan di GEW ku a hiba palabra durante di e konferensia tabata Maduro & Curiel’s Bank, Cuarçao Innovation & Technology Institute (CiTi), Ministerio pa Desaroyo Ekonómiko, The Fempire Society, miembronan di e ‘board’ di GEW Curaçao mes, i Nilda Pinto MBO, ku ta bai tene un siman kompletu di aktividat ku studiantenan di e skol. Otro skol ku ta un partner di GEW Curaçao pa aña 2023 ta Universidat di Kòrsou, ku ta bai tene dos dia di aktividat na e universidat, den kua lo bai dediká atenshon na posibilidatnan ku tin den hasimentu di negoshi for dor di ángulo di sustenibilidat. Alabes por informá ku 3 skol di fundeshi na Banda Abou ya ta hasiendo preparashonnan pa un grandioso Festival di Funchi. Tambe a a informá ku un organisashon ku pa di dos aña konsekutivo ta duna un kontribushon sustansial na realisashon de GEW Curaçao, ta Qredits.
Rekapitulando por bisa ki e aña aki tin un programa amplio i diversifiká, ku banda di loke tin konfirmá te ku awor na aktividat, tur kos ta mustra ku lo sigui amplia. Sra. Pieternella, i otro partnernan, a enfatisá ku trahando huntu, nos pais, no opstante ku kua teritorio ta chikí, e kreatividat di nos hendenan semper a mustra ku nos por logra hopi ora ku uni talento, esfuerso konhunto i konosementu.
Segun dianan i simannan transkurí lo informá via plataformanan di komunikashon di GEW Curaçao kiko por ferwagt e aña aki di Global Entrepreneurship Week.