PROMÉ MINISTER A ORGANISÁ REUNION KU

PLATAFORMA BANDABOU I FUNDASHON VIBA

 

Willemstad – Promé Minister sr. Gilmar Pisas a organisá un reunion ku representantenan di Plataforma Bandabou i Fundashon VIBA dia 20 di òktober 2023.

 

Plataforma Bandabou i Fundashon VIBA tabatin diferente punto ku nan kier a atendé ku diferente Minister di Gabinete Pisas II.

Ta trata aki di Minister di Tráfiko, Transporte i Planifikashon Urbano sr. Charles Cooper, Minister di Desaroyo Sosial, Labor i Bienestar sra. Ruthmilda Larmonie-Cecilia, Minister di Hustisia sr. Shalten Hato, Minister di Enseñansa, Siensia, Kultura i Deporte sr. Sithree van Heydoorn i Minister di Salubridat Públiko, Medio Ambiente i Naturalesa, kual a keda representá pa Promé Minister sr. Gilmar Pisas.

 

Tur e puntonan a keda mandá pa tur e diferente Minister promé ku e reunion pa asina tur e puntonan por a keda atendé debidamente durante di e reunion aki.

Na e reunion tabatin presente Minister di Tráfiko, Transporte i Planifikashon Urbano sr. Charles Cooper, Minister di Desaroyo Sosial, Labor i Bienestar sra. Ruthmilda Larmonie-Cecilia i Promé Minister sr. Pisas, huntu ku e diferente profeshonalnan ku a asistí nan durante di e reunion aki.

E Ministernan ku no por tabata presente, pa motibu di otro kompromiso, a manda nan reakshonnan por eskrito riba tur e puntonan ku tabata konserní kada un.

 

Algun di e puntonan aki tabata drechamentu di kaminda, iluminashon di algun kaya prinsipal, konekshon di transporte públiko, bùs eskolar, parada di bùsnan, petishonnan di tereno ku ta pegá na Domeinbeheer, botíkanan na warda, drechamentu di playanan, Poliklínika na Bandabou, maneho di LVV, drechamentu di Damnan, limpiesa kontinuo i mantenshon di barionan, prosedura di ladronisia di bestia, maneho di patruya polisial pa e área di Bandabou, biblioteka na Barber i mantenshon di vèltnan di deporte.

 

E ministernan a sa di duna tur informashon riba tur loke ya ta den proseso i ku lo bai inisiá pronto kun’é i pa kua temporada i alabes a kontestá tur pregunta ku a bini dilanti riba tur e puntonan ku a keda atendé durante di e reunion aki.

 

E reunion a bai den un hopi bon esfera i Plataforma Bandabou i Fundashon VIBA a keda sumamente agradesido pa e atenshon i informashonnan ku nan a risibí serka Gabinete Pisas II.