Minister Shalten Hato: POLISNAN A RISIBÍ DIPLOMA NA AKADEMIA DI POLIS MIAMI

Kuerpo Polisial Kòrsou lo sigui progresá si invertí den e kapital humano ku ta kurason dje organisashon ku diariamente mester sirbi i protehá nos komunidat. Ta ku e miro aki, resiéntemente tres (3) agente polisial a biaha pa Miami pa sigui un entrenamentu na ‘Miami Dade College School of Justice’ riba diferente area ku ta konserní tráfiko.

E tres (3) miembronan di Kuerpo Polisial a pasa e entrenamentu ku éksito, motibu pa kual Minister Hato ta felisitá kada un. E kurso di entrenamentu tabata enserá entre otro manehá vehíkulo polisial riba velosidat haltu ku diferente téknika, téknikanan di patruyahe, proseduranan kon pa para i òf kontrolá vehíkulonan i tambe kon ta kontrolá un vehíkulo ku glas skur.

P’e motibu aki invershon den e hende ta un prioridat i esaki minister di hustisia a bin ta hasi den estrecho koperashon ku e Kolegio di hefenan di Kuerpo Polisial den Reino. Minister Hato ke felisitá e empleadonan aki di kurason i ta deseá nan hopi éksito den nan futuro karera, despues di a risibí e grato notisia aki.