Karchinan ta sali na benta awe:

TREY SONGZ dia 22 di desèmber

den Curaçao Festival Center

 

WILLEMSTAD:- Kòrsou un biaha mas lo ta esenario pa otro konsierto di taya mundial. E biaha aki ta TREY SONGZ ku lo bishita nos isla pa un presentashon dia 22 di desèmber próksimo den Curaçao Festival Center. Huntu kuné den pre-show otro kantante tòp, FRENNA. Naturalmente Kòrsou su artistanan TSEAN, 2SYNC i ICONS tambe lo tei. E formidabel kombinashon aki a keda hinká den otro mediante KJ74 ENTERTAINMENT, i partnernan stratégiko den industria. Pa e show aki, un bes mas lo embeyesé Curaçao Festival Center di manera ku e por asentuá e totalidat di e konsierto. Massive Productions ta pèrkurá pa lus, zonido i produkshon di e ‘rider’ total di e artista(nan). Karchinan pa e mega konsierto aki ta sali na benta awe.

 

TREY SONGZ, ta konosí pa e.o su hitnan “Say Aah”, ”Heart Attack”, “Na Na” “Slow Motion”, “Neighbours know my name”, i su hit di mas grandi “Bottoms Up” i hopi mas! E tin un siguimentu di mas ku 15 mion siguidó riba retnan sosial, otro 4 mion riba Youtube ku sigur lo ta un tremendo promoshon pa Kòrsou. Nominá pa diferente premio “Best Male R&B Vocal Performance” entre nan un Grammy Award, TREY SONGZ, ta un artista di R&B ku un vokal eksepshonal i ta konosí pa su presentashonnan atrevido. Popular tambe ku e apodo Trigga Trey, e kantante di 38 aña di edat ta forma parti di un kolektivo musikal yamá Ocean’s 7 di kual artistanan Nelly, Usher i Jermain Dupri tambe ta forma parti. TREY SONGZ, su albùm mas resien titulá “Back Home” ta konta ku diferente éksito R&B Urban. Pa dia 22 di desèmber e fanátiko por ta sigur di risibí un tremendo show ku hit tras di hit henter anochi! TREY SONGZ, lo tei ku su ‘live band’ pa duna un show tur afó!

 

KJ74 ENTERTAINMENT

Un ‘record label’ bou maneho di tòp atleta i  picher estelar Kenley Jansen i su partnernan. Ya a kuminsá firma artistanan lokal ku e vishon di impulsá artistanan di Kòrsou riba tarima internashonal. Kenley Jansen ta un amante di músika ku amor pa su isla natal, esaki mes ta inspir’é pa keda invertí den su pashon ku e vishon mas grandi- pa Kòrsou. Asina por menshoná e resiente adishon Rafik- artista di reggaeton urbano ku un siguimentu respetá riba retnan sosial. E tin un kontrato di desaroyo ku KJ74. Dia 22 di desèmber, e konsierto “Love Note” ku presentashon di TREY SONGZ, FRENNA, TSEAN, 2SYNC i ICONS ta otro ehèmpel di invershon den industria di entretenimento lokal.

 

Ta invitá tur fanátiko di TREY SONGZ, FRENNA i e line-up espektakular pa dia 22 di desèmber pa keda pendiente riba retnan sosial. Pronto lo kaba di anunsiá e line-up i mas detaye di e gran anochi aki. Karchinan ‘FANS’ earlybird ta sali na benta awe i ta bal 65 florin i despues lo bira 85 florin, optenibel na Ticket Point Zeelandia, Mensings Caminada i 24 Uur Uit De Muur. Karchinan ‘VIP’ single ta bal 150 florin i ta eksklusivamente optenibel na Ticket Point Zeelandia i Mensing’s Caminada. Den di dos tanda, esaki lo ta 200 florin. Pa informashon di mesa por yama +5999 6969237. Pa karchinan online por bishitá www.alegriacuracao.com