Djasabra 9 di maart ta e gran final di e di 71 sertámen di Miss World
120 beyesa representando mundu henter di difrente continente manera Afrika, Europa, Amerika, Caribe, Asia i Oceania lo tuma parti na e di 71 sertámen di “Miss World” kual ta tuma lugá djasabra 9 di mart próksimo na Mumbai, India.
Miss World Curaçao “Nashaira Balentin” ta forma parti di e 120 beyesanan aki, i tin e gran honor di representa nos dushi país Kòrsou.
Dia 18 di Febrüari último e 120 beyesanan a yega New Delhi, India. Na nan yegada India Tourism Development Corporation (ITDC) na nomber di País anfitrión, a organisá un seremonia i Welcome Dinner pa tur partisipante, prensa internashonal, embahadornan di e 120 País y representantenan di gobiernu estatal di India.
Durante di e aktividat aki nos flamante Miss World Curaçao Nashaira Balentin a hasi uso di e oportunidat balioso aki, pa hiba kombersashon ku dirigentenan di India Tourism Development Corporation (ITDC) i laga nan sera konosi ku nos kultura i tambe a sa di bende nos dushi Kòrsou turistikamente.
Un di e hopi komentarionan di e miembronan di prensa internashonal ta, ku no tin kuestion ni duda ku atrobe nan ta enkantá ku e kandidat grandi di beyesanan espektakular di rónt mundu ku tur aña di nobo ta partisipando na e prestigioso sertámen di Miss World, hasiendo e sertámen di beyesa aki esun di más grandi i prestigioso na mundu.
Durante 3 siman e beyesanan a haña e oprtunidat pa bishitá diferente parti di India i disfrutá di tur e lokualnan ku India tin di ofresé.
Tambe nan a partisipá na aktividatnan manera entre otro, shownan di gala, sekshon di fotografia, desfilenan di moda i tambe na e famoso Fast Track kual ta konsistí di kompetensia manera “Miss World Top Model”, “Miss World Talent”, “Miss World Sport Challenge”, “Miss World Media Challenge”, “Head to Head Challenge” i “Beauty With A Purpose Challenge”. Ganadó di kada un di e kompetensianan aki, outomátikamente lo forma parti di e 40 semi-finalistanan pa e gran final.
Final di e 71 sertámen di Miss World ta tuma lugá na Jio World Convention Center na Mumbai, India i lo wordu transmiti pa mas ku 100 País.
Despues di Coronashon di e 71 Miss World, lo tin un cena di gala na unda lo anunsia e 6 ganadónan di “Miss World Continental”.
ReProD(Reinilla Project Development) na nomber di henter pueblo di Kòrsou ta desea Nashaira Balentin tur klase di eksito na e di 71 sertámen di beyesa mundial “Miss World”.
