Vários dam ta yen pero den bon estado i no ta okashoná difikultat

Vários dam ta yen pero den bon estado i no ta okashoná difikultat

Willemstad –  E departamentu di Ministerio di Salubridat, Medio Ambiente i Naturalesa (GMN) ku ta enkargá ku maneho di damnan a hasi su rekorido na diferente dam riba nos isla ku por okashoná difikultat momentu ku esakinan yena ku awa.Damnan na Kòrsou ta duna un bunita bista despues ku hopi áwaseru kai i nan ta forma tambe un ambiente ideal pa paranan akuátiko manera sierto sorto di patu i flamingo.

Durante rekoridonan ku Ministerio di GMN a hasi por bisa ku esaki ta e damnan ku a wòrdu kontrolá i por okashoná difikultat momentu ku hopi awa kai. E famoso Dam di Muizenberg i Dam di Kabouterbos ta yen di awa, pero den bon estado i tin sufisiente espasio pa akapará mas awa. Dam di Kura Piedra, Dam di Kas Grandi i Dam di Julianadorp ta yen di awa i a kuminsá saka awa for di e sakadó pero no ta okashoná difikultat. Dam di Malpais, Dam di Hòfi Moringa i Dam di Montaña Rey ta yen di awa, pero por retené mas awa i lo sigui monitòr e situashon. Pa loke ta trata e Dam di Montana Rey ta warda áwaseru baha pa limpia e dam. Damnan ku no tin masha awa aden ta Dam di Sapateer, Dam Pretu, Dam di Lagun i Dam di Soto.

E departamentu ku ta enkargá ku maneho di damnan di Ministerio di GMN ta sigui monitoriá tur dam na Kòrsou durante e periodo aki ku hopi áwaseru i lo informá komunidat momentu ku esaki ta nesesario. Riba potrètnan por mira Dam di Hòfi Moringa i Dam di Julianadorp i su sakadó.