Djasabra awor lo bai tin un tremendo Funday Food Festival
Djasabra awor lo bai tin un tremendo
Funday Food Festival
Willemstad- Djasabra 4 di nòvember prόksimo ta bai tin un grandioso Funday Food Festival na Erosweg 52, riba parkeerplaats di iglesia House of Worship. For di 12’or di mèrdia pa 7’or di anochi lo bai ta un dia super fun pa henter famia kaminda mucha, hόben i adulto por bin i disfrutá di un ambiente ameno, kumindanan delisioso, entretenimentu i hopi mas. Entrada pa e Food Festival aki ta grátis i pueblo di Kòrsou kompleto ta invitá pa asistí.
E Funday Food Festival aki ta konta ku un variedat grandi di kuminda krioyo, diferente tipo di sòpi, “street food” manera BBQ, hamburger i wings, kumindanan tradishonal di fin di aña, kuminda sürnam, kuminda italiano, kuminda vegetariano, diferente estilo di pasaboka, batido, refresko i hopi mas. Pa esnan ku ta deseá opshon saludabel, esaki tambe lo ta disponibel.
Pa hasi e dia aun mas agradabel, lo tin entretenimentu pa mucha, bouncer, pintamentu di kara, dekorashon di cupcake i hopi aktividat mas pa e muchanan por pasa un dushi dia den un ambiente sano. Den nos kids corner e muchanan por hunga, refreská i ches, segun nan mayornan tambe ta disfrutá di e ambiente.
Ademas di esaki, lo bai tin animashon di DJ i tambe presentashon di diferente artistanan. E públiko lo keda sorpresá ku diferente presentashon kada 30 minüt. Entre e presentashonnan lo bai tin presentashon di Muchanan Balente College i Hόben Balente College, Dance Academy How to Dance, ku lo presentá un baile ku alrededor di 100 bailarin i bailarina. Tambe lo tin Deborah Eendragt i Krystle Rosario ku lo deleita e públiko ku dushi músika di pasku, pa nos por kuminsá drenta den e esfera di fin di aña. Banda di esaki lo tin tambe presentashon di Da Blue Room i tambe Andy Moes ku ta hόbennan ku ta profilando den e género di músika urbano aki na Kòrsou.
Pues, djasabra awor 4 di novèmber, for di 12’or pa 7’or di anochi, riba parkeerplaats di Iglesia House of Worship, pueblo di Kòrsou kompleto ta invitá pa bin i pasa un Funday. Entrada ta grátis. Bini unu, bini tur!
