LABdeMED ta konsientisá tokante diabétis ‘konosé bo riesgo, konosé bo respuesta’: NO TA PASÓ BO TIN SUKU BIDA A KABA!

LABdeMED ta konsientisá tokante diabétis ‘konosé bo riesgo, konosé bo respuesta’:

 

NO TA PASÓ BO TIN SUKU BIDA A KABA!

 

Willemstad – 12 di Novèmber 2023= E aña aki tambe Laboratorio de Medicos (LABdeMED) ta pone debido atenshon na e situashon di diabétis lokal den kuadro di Dia Mundial di Diabétis. E tema na nivel mundial e aña aki ta “Konosé bo riesgo, konosé bo respuesta”. LABdeMED ke konsientisá komunidat tokante di e eskohonan ku por minimalisá e riesgo di diabétis. E eskoho di un bida saludabel sigur por prevení e malesa aki i yuda e pashènt di diabétis hiba un mihó bida. LABdeMED un biaha mas ta bin ku un algu nobo ora e uni e aña aki na e esfuerso di Fundashon Desaroyo Deportivo Kòrsou (FDDK) i i forma parti di e promé “International Sports Week Curaçao.” Durante di e evento magno aki LABdeMED lo duna diferente workshop ku ta edukativo pa pashèntnan di diabétis, pero tambe di gran balor pa komunidat en general. Tambe lo por hasi tèst pa chèk e suku kompletamente grátis. Banda di esaki LABdeMED lo tin un seshon edukashonal tambe pa dunadónan di kuido pa asina sosten’é nos profeshonalnan den nan trabou.

 

E realidat ta ku diabétis ta un malesa ku tantu chikí i grandi por haña. Niun hende no ta inmune p’e i lamentablemente no tin kura. Mas lihé nos ta konsiente di esaki, i rospondé dor di skohe pa un bida saludabel, mas mihó esaki resultá benefisioso pa nos komunidat kompletu. Personanan ku ya tin diabétis tin e reto pa hasi un kambio na e manera di biba di kustumber pa asina prevení e konsekuensianan ku diabétis ta trese kuné. LABdeMED ta bon konsiente di e reto aki pa pashèntnan di diabétis. No ta tur ora pashèntnan ta komprondé e berdadero nifikashon di kambio di estilo di bida. Pero e realidat ta ku hiba un bida salú komo diabétiko por resultá en bèrdat den un bida dushi i trankil.

 

Rudy Le Blanc gerente di LABdeMED a bisa “Nos ta kontentu ku un biaha mas LABdeMed por aportá na konsientisashon di nos komunidat tokante di e malesa diabétis, e forma di biba ku por prevení diabétis òf biba ku e malesa unabes bo tin’é. Na mei último nos a tene nos propio siman di diabétis, hustamente pa konsientisá mas, i e luna aki nos ta duna nos aporte di kustumber pa sigui konsientisá. E aña aki den un bachi inovativo atrobe ora un i tur por bishitá nos den e programa di FDDK Ban Move na Sambil. Dia 18 i 19 di novèmber nos lo perkurá pa algun workshop inovativo i sumamente informativo pa tur ku tei presente. Mas ku klaro nos ta brinda tambe oportunidat pa chèk suku den nos bùsnan ku tambe lo ta den e sala di Exhibition Hall.”