Mark Volmerink komo hefe nobo di departamento di finansa entidat públiko Boneiru

15 nov 2023

Mark Volmerink tin eksperensia amplio den su área profeshonal, na Hulanda pero tambe na Boneiru

For di 15 di novèmber próksimo señor Mark Volmerink ta bira e hefe nobo di departamento di finansa na entidat públiko Boneiru.

Ku esaki entidat públiko Boneiru ta trese un profeshonal riba tereno di finansa ku enfoke riba resultado den e organisashon. Mark Volmerink tin eksperensia amplio den su área profeshonal, na Hulanda pero tambe na Boneiru. Pa hopi aña e tabata hefe di finansa di Komunidat di Skol Boneiru (SGB) i seguidamente vise presidente di e hunta di direktiva. Promé ku e tempu ei el a desempeñá diferente funshon finansiero serka vários organisashon, entre otro na Hulanda. Te na su nombramentu na entidat públiko Boneiru el a ehersé algun funshon di supervishon den vários direktiva, entre otro na Fundashon Propiedat Inmóbil Boneiru.

Mark Volmerink ta bai dirigí empleadonan  di departamento di finansa. Komo hefe di departamento e lo duna su aporte na desaroyo i ehekushon di e metanan stratégiko i e plannan di maneho di entidat públiko Boneiru. Tambe e ta bai duna guia na proyektonan kompleho ku impakto polítiko òf sosial. Banda di maneho integral di e departamento,  e ta karga responsabilidat pa entre otro maneho finansiero na òrdu, deklarashon aprobá pa akountent, siklo di planifikashon i kontrol i reportahe. Departamento di finansa ta sòru pa atministrashon finansiero i maneho di impuesto lokal.

Mark Volmerink a lanta na Kòrsou i a studia ‘accountancy’  na Hulanda na HEAO i na Vrije Universiteit di Amsterdam. For di 2017 e ta traha i biba na Boneiru.