APERTURA SIMAN DI KAHA DI ÒRGEL 2023
MINISTERIO KONSERNÍ ENSEÑANSA, SIENSIA, KULTURA & DEPORTE
APERTURA SIMAN DI KAHA DI ÒRGEL 2023
PUBLIKÁ RIBA 23 NOVÈMBER 2023
WILLEMSTAD – Apertura di Siman di Kaha di Òrgel a tuma lugá na Otrobanda, riba Plasa Brion. Esaki a kuminsá ku un desfile di 6 grupo di baile di adulto i un grupo di baile di mucha. E kahanan di òrgel a bai den un karavana di wabi akompañá pa ministernan sr. Sithree van Heydoorn, sra. Ruthmilda Larmonie i sr. Ruisandro Cijntje. Nan a sali for di Renaissance Wind Greek i pasa viadukto direkshon di Plasa Brion. Durante di e programa a konta historia kon tabata baila kaha di òrgel ántes. Sra. Ridia Luciano a duna splikashon di trahe típiko ku ta bisti durante e tempu ei, na momento ku ta bai baila kaha di òrgel.
Tabatin presentashon di Grupo Harmonia i Goso, Dúndula, Solo, Gordon & Friends, Baranka, i Luna Rondoná ku Amor. Nan a baila dansa i tumba pa bai konopá e baile di kaha di òrgel na e generashon mas hóben. Tambe a tene presentashon di Grupo di Baile Hubenil ‘Pilarnan di Futuro’ riba ritmo di kaha di òrgel ‘Mi Futuro’ di Francis Luciano. Nan a baila un wals i un mazurka. Ademas, duna rekonosementu na Elvio (Buchi) Grotestam, komo e tokadó ku tin mas tantu aña ta toka wiri. Despues di esaki minister enkargá ku kultura sr. Sithree van Heydoorn a deklará Siman di Kaha di Òrgel ofisialmente habrí.
Kaha di òrgel ku a presentá riba Plasa Brion e atardi ta: Mi Futuro, Cicilia, El Vencendor, Mi Reina, La Primavera i Reskate.

















