Artistanan lokal, emisoranan, Horeca i gobièrnu mester uni den asuntu di kobra pa derechinan di outor.
Artistanan lokal, emisoranan, Horeca i gobièrnu mester uni den asuntu di kobra pa derechinan di outor.
Ya algún tempu tin un disputa entre e organisashon Ducapro i stakeholdernan lokal tokante kobramentu di lisensia pa por hasi uzo di obranan musikal na Kòrsou. Ducapro, esta Dutch Caribbean Performing Rights Organization, tin komo tarea representashon di outor i artistanan lokal i internashonal, i kobra pa uso di nan obranan. Ducapro a sigui ku su empeño na hermana isla Aruba i e menasa pa e polémika yega Kòrsou ta real. Partidonan MAN-PIN ta konvensí ku outornan di obranan musikal lokal, emisoranan, horeca i organisadónan di evento huntu ku gobièrnu mester aktua purá pa evitá ku e polémika ta eskalá den desbentaha di henter komunidat.
Informashonnan verídiko ku MAN-PIN ta disponé di dje ta indiká, ku e organisashon Ducapro a sera un akuerdo ku SOCAN pa atministrá derechinan di outor na Aruba, Kòrsou, Boneiru i St. Maarten. SOCAN ta un organisashon Kanades ku ta atministrá lisensia pa uzo di músika. Den Reino tambe tin organisashonnan similar manera BUMA i STEMRA. Generalmente e organisashonnan aki tin komo meta pa protehá derechi di outornan di obranan musikal rònt mundu. Esaki riba su mes ta hustu.
Atministrashon di lisensia i kobramentu di derechi di outor i otro derechinan den e forma presentá pa Ducapro sin embargo ta krea un problema ku por afektá desaroyonan sosio-ekonómiko i kultural na Kòrsou di forma basta negativo. Nos ta resumí e puntonan problemátiko mas prinsipal:
- Informashonnan ku ta sirkulá den media ta hasi menshon di un suma di 3,000 florin pa luna pa lisensia pa emisoranan. Esaki lo oumentá gastunan di hasi negoshi i afektá entrada di emisoranan lokal. Konsekuentemente, kuponan di trabou di esnan ku ta laborá den e sektor por ta na peliger.
- Tambe, ta lógiko ku e sektor, ku ta generá entrada pa medio di propaganda, lo subi su tarifanan pa kubri e gastu aki. Esaki lo oumentá gastunan di kompanianan lokal i finalmente ta e konsumidô ta paga mas, mientras kada dia Kòrsou ta bira mas karu.
- Meskos ta konta pa establesimentunan manera hotel, restorant, kafé i organisadónan di fiesta. Pago pa lisensia na Ducapro lo nifiká un oumento di gastu ku finalmente ta e konsumido lo paga.
- Pero, den kaso ku no yega na un akuerdo, Ducapro por buska su derechi den korte. Si nos ta konsiente ku aki ta trata di tantu obranan lokal registrá (p.e. na ASCAP of BUMA/STEMRA) komo obranan di outornan di pafó di nos isla, empresanan lokal lo ta lomba kontra muraya den tal kaso. E opshon pa nò toka ningun obra di outornan djafó òf lokal ku obranan registrá, tampoko ta real. Un gran kantidat di outornan lokal lo keda gravemente perhudiká, dado kaso ku emisoranan stòp di toka nan obranan. Den un kaso asina, henter nos desaroyo kultural ta na peliger.
- Establesimentunan ku ta fihá riba bishitantenan djafó i ta ofresé músika internashonal den nan establesimentu lo sufri i ku esaki nos produkto turístiko.
- Ducapro ta fiha e preis di lisensia basá riba su propio método. Hasiendo esei, empresanan ta keda na merset di Ducapro sin tene kuenta ku empresanan hopi chikí of esnan ku meramente ta generá entrada pa kubri nan gastunan koriente.
Gobièrnu su man ta mará? Partidonan MAN-PIN ta konsiderá ku aki gobièrnu mester tuma rienda di e asuntu. Tin diferente sektor enbolbí ku interesnan grandi ku por ta konfliktivo pa ku otro.
Rekomendashon.
Gobièrnu o ministernan enkargá ku kultura, entretenimentu i horeca por regulá tarifanan pa lisensia den kaso ku interes general ta na peliger. Hasiendo esei, gobièrnu por eksonerá empresanan ku por keda afektá di un manera ku lisensia i kobramantu no ta mina nan eksistensha. Tambe gobièrnu por negoshá ku Ducapro na nòmber di tur sektor enbolbí, pa sigurá ku den kaso ku atministrá derechinan di outor i otronan lokal, práktikamente tur entrada ta bai bèk pa e outor, pa desaroyo kultural i turístiko i desaroyo di media. Gobiernu mester perkurá ku ta un parti chikí so por keda uzá pa atministrashon. Pa hasi esei tur aktornan enbolbí i esnan ku lo por keda afektá mester sera kabes i di un manera transparente yega na un aserkamento konhunto.
