KURSO DI PROTOKÒL I ETIKÈT

  Kurso avansá di Protokòl i Etikèt pa personal di Sektor di Kultura i Deporte

 WILLEMSTAD  – Personal di Ministerio di Enseñansa, Siensia, Kultura i Deporte (ESKD) a partisipá na un kurso avansá di protokòl i reglanan diplomátiko di etikèt. Minister di ESKD sr. Sithree van Heydoorn ta kere ku organisashon di nos aktividatnan nashonal mester kana konforme protokòl i reglanan diplomátiko. P’esei un grupo di personal ku ta traha den e ministerio akí a partisipá na e kurso akí durante e lunanan sèptèmber, òktober i novèmber 2023. Sr. Tom Josefa, dosente di Intermedia Consultants, a duna e kurso. 

Den e kuadro akí Sektor di Kultura i Deporte ku ta forma parti integral di Ministerio di ESKD ta organisá gran mayoria di e aktividatnan nashonal, i tambe ta enkargá ku e parti protokolar mará na e aktividatnan. Banda di esaki e Sektor ta duna sosten i guia na otro ministerio- i organisashonnan ku ta rekerí esaki pa organisá evento kultural/deportivo.  

 Algun di e temanan ku a trata den e kurso ta: reglanan di gastronomia i etikèt general, introdukshon na e mundu di protokòl internashonal, tareanan di un host/hostess, protokòl di bandera, tira diskurso i sintamentu segun órden di importansia, protokòl di servisio na mandatarionan i hopi mas. E tabata un kurso masha interaktivo kombiná ku teoria, kaminda kada partisipante a haña oportunidat pa partisipá aktivamente sea den grupo òf di forma individual. 

A tene un seremonia ofisial kòrtiku na e ofisina di Sektor di Kultura i Deporte kaminda a hasi entrega di sertifikado na e partisipantenan. 

 ** Riba potrèt por mira entrega di sertifikado na tur e partisipantenan.