Promé Minister sr. Gilmar Pisas a partisipá na e seshon di eksplorá otro modalidat pa aselerá akshonnan di klima na Dubai
Promé Minister sr. Gilmar Pisas a partisipá na e seshon di eksplorá otro modalidat pa aselerá akshonnan di klima na Dubai
Willemstad – Promé Minister sr. Gilmar Pisas a partisipá na e seshon di eksplorá otro modalidat pa aselerá akshonnan di klima pa nos islanan den Reino na Dubai.
E e seshon aki a keda organisá den e paviljoen di Benelux kaminda Kòrsou tambe tabata co-host den esaki.
Promé Minister sr. Pisas tabata oradó i den su diskurso e la indiká e efektonan di kambio di klima ku ya Kòrsou ta eksperesiando manera entre otro, ola di kalor, inundashon ku ta kousa molèster, inundashon na kosta i muchu mas.
Tur esakinan ta un menasa pa seguridat i “livelihood” di nos komunidat i e efektonan por redusí nos desaroyo sosio-ekonómiko pa futuro.
Esaki tambe ta konta pa tur país i ta pesei nos mester desaroyá stratégianan huntu pa por aselerá e implementashon di e akshonan klimátiko.
Na nivel nashonal mester kuminsá inkluí sektor privá muchu mas, NGO’s, institútonan finansiero i tambe tur e ministerionan di Gobièrnu.
Den e kuadro aki Promé Minister sr. Pisas a trese tres punto hopi importante dilanti:
- Ta imperativo pa tin un vision nashonal fuerte ku un sistema di goberná pa alineá tur strategia i akshonnan na nivel nashonal.
Den e kuadro aki Gobièrnu a establesé e Plataforma pa Kambio di Klima pa esaki por duna e guia nesesario i duna Gobièrnu e konsehonan al respekto.
- Mirando ku islanan generalmente tin kapasidat limitá pa por desaroyá i implementá tur e akshonnan, e ta sumamente importante pa Kòrsou konsiderá pa traha huntu ku otro paisnan i esaki lo tin un balor agregá pa e islanan. Spesialmente e islanan ku ta den Reino.
- Tambe mirando ku kambio di klima no ta tene kuenta ku e struktura konstitushonal di nos islanan, solushonnan finansiero mester keda kreá pa tur isla por tin akseso na e fondonan nesesario pa nos por implementá tur e akshonnan.
Tambe a hiba palabra e Enviado Spesial di Klima pa Reino, sr. Prins Jaime de Bourbon de Parma, Sr. Albert Martis, Presidente di e Plataforma di Kambio di Klima i Sr. Gianni Chianetta, CEO di Global Renewable Aliance.
Después di e diskursonan a sigui un diskushon den pènel ku e representantenan hóben den Reino, pa asina e oudensia por a skucha nan eksperensia i puntonan di atenshon i akshonnan ku nan ke risibí oido p’é.
Por a konkluí ku nos mester stimulá e enbolbimento i partisipashon di nos hóbennan den Reino na nivel nashonal i tambe interkambiá ku nan muchu mas, pa asina nos hóbennan por sigui krea mas konosementu riba e tema aki.
Tambe a keda konkluí ku nos mester krea insentivonan pa trese nos hóbennan ku a kaba di studia bèk nan pais i duna nan e sostén nesesario den e trayektonan di kambio di klima.
Hulanda a pone fondo speshal relashoná ku kambio di klima pa islanan den Reino por ehekutá sierto programanan.
E enkuentro aki tabata unu hopi fruktífero i e tabata tambe sumamente importante pa skucha tur e opinionnan ku a bini dilanti di e hóbennan riba e materia di kambio di klima i akshonnan di klima.