Selebrashon ku un siman di deskubrimentu , empoderashon i desaroyo di abilidatnan
Selebrashon ku un siman di deskubrimentu , empoderashon i desaroyo di abilidatnan
Willemstad- E aña akí, EU Desk Curaçao orguyosamente ta selebrá 5 aña di eksistensia na Kòrsou. Huntu kubo, EU Desk Curaçao ke marka e mia akí ku un evento ekstraordinario ku lo dura henter siman for di 11 te ku 15 di desèmber próksimo. Durante e siman akí ta bai tin diferente enkuentronan virtual den e asina yamá ‘EU Funds Week 2023’ (Siman di Fondonan Oropeo) kaminda un i tur ku ta interesá por partisipá fásilmente for di unda ku nan ta. ‘EU Desk Funds Week 2023’ ta karga e tema ‘Diaspora Dynamics: Empowering Curaçao’s Future through Knowledge Transfer’. Kada seshon durante e siman ta enfoká riba konosementu i abilidatnan di tantu Kòrsou su diáspora rònt mundu pero tambe nos stakeholdernan lokal, trahadónan di maneho, empresarionan i ekspertonan. Seshonnan durante e siman akí ta trata tópikonan manera entre otro teknologia, abilidatnan kreativo, salubridat, ekonomia sirkular i di bienestar pero tambe tópiko di polítika i atministrashon. EU Desk Curaçao ta un departamento ku ta kai ya pa 5 aña kaba bou di e Sektor di Koperashon Ekonómiko Internashonal di e Ministerio di Desaroyo Ekonómiko (MEO) i ta fungi komo sentro di kontakto na Kòrsou pa programa i fondonan Oropeo di supsidio.
EU Funds Week 2023 ta keda organisá ku e meta prinsipal pa promové mas desaroyo ekonómiko i sosial na Kòrsou pa medio di inklushon di nos diáspora. Spesífikamente, EU Desk Curaçao ta enfoká pa hasi mas i mihó uso di e produkshon inovativo i e kapasidatnan di invershon di nos diáspora rònt mundu, pa yuda nos yega na implementashon eksitoso di Kòrsou su Strategia Nashonal di Eksportashon. Ta evidente, ku Kòrsou su diáspora por yuda krea ‘netwerknan’ sumamente balioso ku por sostené e desaroyo den e sektornan ku Gobièrnu a marka komo prioridat den e Strategia Nashonal di Eksportashon; por ehèmpel e sektor di IT i e Industria Kreativo. E evento i seshonnan di ‘EU Desk 2023’ ta keda organisá pa Ministerio di Desaroyo Ekonómiko (MEO) den kolaborashon ku Ministerio di Desaroyo Sosial, Labor i Bienestar (SOAW), Ministerio di Asuntunan General, representashon spesial di islanan BES, Union Oropeo, agensia di Erasmus+ i Agensia di Creative Europe.
Seshonnan virtual durante e siman ta tuma lugá di 9:30 di mainta pa 12’or di mèrdia i di 2’or di mèrdia pa 5’or di atardi. Tur persona na enkargo di trahamentu di manehonan i tomo di desishon den nos Gobièrnu ta keda invitá pa partisipá, pero tambe stakeholdernan na nos hermana islanan i Hulanda, representashon di nos sektor empresarial, NGO’s lokal, profeshonalnan, ekspertonan, dosentenan di skol, investigadónan i tur persona interesá. Partisipashon na e seshonnan ta grátis i por manda un e-mail na eudeskcuracao@gmail.com òf registrá via di e formulario di registro pa por risibí e lenk di zoom pa tuma parti na e diferente seshonnan.
Pa un bista di e programa di henter e siman di ‘EU Funds Week’, i e formulario di registrashon por bishitá https://bit.ly/EUFUNDSWEEK2023
