Stagiairenan di GMN ta hasi investigashon di piská importante na Kòrsou

Stagiairenan di GMN ta hasi investigashon di piská importante na Kòrsou

Willemstad – Aña pasá Ministerio di GMN a hasi un bishita di trabou na Wageningen Marine Research (WMR) na Universidat di Wageningen na Hulanda. Durante e bishita di trabou aki a indiká ku Ministerio di GMN ta deseá pa krea posibilidatnan di investigashon pa studiantenan ku ta benefisiá tur dos organisashon. Basá riba esaki a krea e posibilidat i awor tin 2 studiante di Universidat di Wageningen ku ta hasiendo investigashon di piská aki na Kòrsou. Nan ta trahando riba proyektonan di investigashon di video ku FAD’s, Fish Aggregation Devices (FAD’s ta artefaktonan ku ta drif den laman i ku ta atraé piská), piskamentu den haf i investigashon di Masbangu.

E trabounan ta wòrdu ehekutá dor di Blanche Helena Madeleyn i Job Goorden di HAS Green Academy na s’ Hertogenbosch den kolaborashon ku ekspertonan lokal di GMN, piskadónan i WMR. E studiantenan a kuminsá na inisio di sèptèmber i nan trabou tin un durashon di 22 siman. Ministerio di GMN i kolaboradó Faisal Dilrosun ta asumí mayoria di e maneho di tur dia ku sr. Owen Clements i dr. Adolphe “Dòlfi” Debrot di Wageningen Marine Research komo kordinadó. Dòlfi den pasado tabata sientífiko i despues direktor di Carmabi aki na Korsou.

Investigashon ku video di FAD ta pa analisá kua tipo di piská ta wòrdu atraé na e FAD i kuantu. Tin e impreshon ku sierto tipo di piská manera tuna tropikal ta konsentrá rònt di artefaktonan ku ta drif manera e FAD. E kantidat di FAD den Karibe ta oumentá pero investigashon relashoná ku esaki ta limitá. Piskamentu den haf ta studia kua piskánan nos piskadónan ta piska, kuantu i ku kuantu esfuerso. E investigashon na haf lo duna un bista balioso den e aktividadnan di peska di Curaçao. Esaki lo tuma lugá na e hafnan mas grandi di Korsou. Investigashon di Masbangu ta mustra edat ku Masbangunan tin i nan temporada di reprodukshon.

Intenshon ta pa stagiairesnan nobo kontinuá ku e investigashonnan. Por ehèmpel kolektá dato di historia di bida di Masbangu ta un tarea ku ta tuma hopi tempu paso ainda nos no tin masha informashon di e piská aki. Finalmente ta e intenshon pa e konklushonnan i rekomendashonnan formulá den e raportahe kondusí na optimalisashon di maneho di nos peska.

Riba potrètnan por mira e stagiairenan Blanche Madeleyn i Job Goorden i di AVB (ántes LVV) señores Faisal Dilrosun i Siegfried “Pipi” Constancia.