Gabinete Pisas II ku intento serio pa kibra Selikor!
Gabinete Pisas II ku intento serio pa kibra Selikor!
Kolaboradó di frakshon di MAN-PIN, Eugene Cleopa ke sa ta kiko e intenshonnan real di gabinete Pisas II ta ku kompania di limpiesa, Selikor. E ta lansa e pregunta aki despues di a tuma nota di intentonan nobo i serio di e aktual gobièrnu di MFK i PNP pa kibra kompania di limpiesa, Selikor.
Pa Cleopa ta bisto ku Gabinete Pisas II tin intenshon serio pa kometé aktonan ku ta perhudiká Selikor. E ta mustra ku ta for di komienso di 2023 gobièrnu a nenga di paga Selikor pe servisio di limpiesa den bario. Un tarea ku for di momento ku a funda Selikor a kumbiní ku e kompania lo ta enkargá kuné.
“Ta masha beheit gobièrnu a hasi pa keda sin paga pa e trabou di limpiesa den bario ku Selikor a hasi durante 2022. Gobièrnu a presta su mes pa humiá e trahadónan di Selikor, bisando ku nan NO a hasi e trabou i gabinete Pisas II a bai asina leu pa pidi siudadanonan saka portrèt pa asina gobièrnu haña prueba ku a hasi e trabou di limpiesa.
Ku esaki, segun Cleopa gobièrnu ta hasi komo si fuera ku trahadónan di Selikor ke kobra pa un trabou ku nan no a hasi. “Pero ta parse ku e humiashon aki no tabata basta. Awe na aña 2024 gabinete Pisas II su akshonnan atrobe ta mustra den mesun direkshon atrobe. A keda sin duna Selikor e suma presupuestá pa hasi limpiesa den bario konforme palabrashon i asina ta kometé un akto ku por kibra e kompania.”
Den e kuadro aki Cleopa ta kuestioná intenshonnan di gabinete Pisas II pa den tempu di elekshon (2024/2025) duna kontratistanan trabou kaminda polítikonan ta bai parti trabou pa kontratistanan amigu. “Mi no ta kere ta otro, pasombra mi a skucha un minister na bos haltu bisa ku si ta pe, masha dia a kita e trabounan aki for di Selikor i manda nan Ministerio di VVRP.”
Cleopa ta kuestioná kon por ta posibel ku na bos haltu ta pidi pa pasa e trabounan aki pa Ministerio di VVRP miéntras ku den un karta ofisial parlamentario pa partido Nashonal, Sheldry Osepa a bisa ku na Ministerio di VVRP tin korupshon ku kontratistanan i ku asta tin un investigashon penal andando den e ministerio. “Pues ta imposibel ku ta pasa e trabounan di limpiesa pa Ministerio di VVRP i mi ta reiterá krea un struktura kaminda ta hasimentu di polítika ta bai tin ku den pasado a kondusí asta na kaida di mandatarionan.”
MAN/PIN ta kere ku si gabinete Pisas II NO ta kere den integridat di Selikor i ku e kompania NO ta sufisiente transparente den otorgamentu di trabou na kontratistanan, gobièrnu tin tur espasio pa via di reunion di akshonista (AvA) hasi pregunta riba e sistema i asta kambia esaki na gobièrnu su smak. “Pero NO skohe pa kita pan for di boka di trahadónan di Selikor.
Gabinete Pisas II a disidí atrobe pa duna Selikor hopi ménos fondo, loke ta pone kuponan di trabou na peliger.”
MAN/ PIN ta kere ku mester bini ku un struktura ku ta garantisá kupo di trabou, pero hopi importante pa mantené kayanan di Kòrsou limpi i NO manera Kòrsou tabata fin di aña 2023, esta ku shushi tur kaminda i palunan a krese riba alsera i riba kayanan!
Un biaha mas MAN/PIN ta bisa gabinete Pisas II pa kita nan dede for di riba e trahadónan di Selikor.
Sr. Eugene Cleopa

