HOPI BUT A KAI DURANTE AKSHONNAN KONTRA IREGULARIDAT DEN RET DI AQUALECTRA
HOPI BUT A KAI DURANTE AKSHONNAN KONTRA IREGULARIDAT DEN RET DI AQUALECTRA
Willemstad, 16 di yanüari 2024 – Despues di un periodo di dispensashon di 2 luna, kual a finalisá riba 31 di òktober, e tim di kontròl a dal paso firme pa enfrentá iregularidat na e ret di distribushon di Aqualectra i tambe uso ilegal di awa i/òf koriente. Entre 1 di Novèmber 2023 te ku awor ya a kontrolá mas ku 308 negoshi, tienda i bibienda i for di esakinan 6 negoshi komersial i 54 residensia a haña but. E butnan den situashonnan kaminda konstatá iregularidat por yega te na 20.000 florin. E butnan mas haltu ku a kai e periodo aki tabata 15.000 florin na un negoshi na Rooseveltweg i 15.000 florin na un negoshi situá na Santa Rosaweg.
Personanan ku ta krea iregularidat den e ret di awa i koriente dor di manipulá instalashonnan òf dor di kambia òf kita parti di e ret di awa i/òf koriente ilegalmente, ta kousa hopi pèrdida di entrada pa Aqualectra. Konsekuentemente, iregularidat den nos ret ta krea hopi gastu adishonal pa nos komunidat. Aktualmente komunidat kumplidó ta karga e gastunan di iregularidat kousá pa terseronan den nos ret di distribushon di awa i koriente. Ademas, na momentu ku tersernan manipulá e ret di distribushon, nan por kousa situashonnan fèrfelu i disturbio pa e area kaminda nan ta kita por ehèmpel kabel òf pipa di awa.
Pa kontra arestá esaki, e tim di kontròl ta sigui ku su trabounan pa detektá i para iregularidat den nos ret di distribushon di awa i koriente. E tim di kontròl ta konsistí di Aqualectra, KPC i OM. Na momentu ku konstatá situashonnan ilegal na bibienda, negoshi òf otro lokalidat, e habitante òf doño di negoshi por konta ku butnan haltu ku por yega te na 20.000 florin, pago di gastunan pa korekshon di e instalashonnan, posibel denunsia i publikashon den media di e akshonnan ku a tuma lugá. E personanan aki tambe mester tene kuenta ku banda di e but, nan mester paga pa e gastunan di uzo no registra di koriente i of awa ku ta mará na e periodo ku e iregularidat tabata tuma lugá i kualke debe bieuw.

