AÑA TA HABRI FFK KU RÈFRI NORBERTO DA SILVA RIBA LISTA DI FIFA PA DI 2 AÑA KONSEKUTIVO!
AÑA TA HABRI FFK KU RÈFRI NORBERTO DA SILVA RIBA LISTA DI FIFA PA DI 2 AÑA KONSEKUTIVO!
Ku orguyo FFK i Departamentu di arbitrahe ta anunsiá ku pa di 2 aña konsekutivo Norberto Da Silva ta riba lista di FIFA. E aña aki tambe, meskos ku aña pasá, Norberto ta nos úniko rèfri ku ta elegibel pa dirigí partidonan internashonal tantu den eksterior komo aki na Kòrsou.
Mas ku klaro FFK i Departamentu di Arbitrahe ta sumamente kontentu i orguyoso ku un aña mas nos tin un rèfri riba lista di FIFA despues ku pa vários aña esaki no tabata e kaso. Nos lo sigui traha duru pa sigui krea mas rèfri ku por dirihí nos weganan lokal pero tambe weganan internashonal riba un nivel profeshonal. Tiki tiki pero sigur nos lo por mira mas di nos rèfrinan ta destaká i den futuro mas di nos hóbennan riba lista di FIFA, representado nos dushi isla.
Aki ta sigui un entrevista chikí ku Norberto kaminda e ta kompartí mas di su logro; ‘Mi ta sinti mi orguyoso i kontentu di tin e honor di por representá Kòrsou riba nivel internashonal komo rèfri di FIFA. Den 2023 kual tabata mi promé aña, mi a haña diferente invitashon pa aktua internashonal kuminsando ku kualifikashon pa Mundial U-17 na Guatemala, siguiendo ku Concacaf Club Shield na St. Kitts i asina sigui pa diferente wega di Caribbean Cup i Nation’s League. M’a siña masha hopi mes i konosé hopi kolega di otro paisnan di Karibe. Mi ta tin e privilegio di aktua ku rèfrinan manera Ricky di Aruba, Yadel di Cuba, Randy Encarnasion i hopi mas. Kada un wega ayafó ta diferente i bo ta siña hopi di dje pa bo ta mihó den bo siguiente weganan. Tambe mi ta keda kontribuí ku partidonan lokal, durante training i lès duna mi aporte i ta un ehèmpel pa esnan ku tambe un dia lo por subi riba lista. Den e korto tempu ku mi ta rèfri mi a mira hopi kambio, tantu den e instruktornan pero tambe den e partisipashon di árbitronan mas hóben. Esei ta yena mi ku gana di sigui ta un ehèmpel pa nan ya asina nos komo kuerpo por sigui duna nos parti pa e deporte di futbòl sigui krese. Aun falta hopi pa nos yega na un nivel mas haltu i kosnan chikí pa drecha, pero tur kos ta un proseso. Djis mester keda tene bo meta bo dilanti i ta positivo den bo trayekto. Semper lo tin desafionan i kosnan menos positivo pero ta keda na kada ken si nan ta hinka energia den e tiki kosnan malu òf bo ta sigui enfoká pa bai dilanti. Mi ta spera e aña aki tambe mi por sigui duna mi aporte i optené mas eksperiensia komo árbitro tantu lokal komo internashonal’.
Palabranan sabio di Norberto ku sigur por yuda tur ku tin ambishon di bira rèfri i subi lista di FIFA.
FFK i Departamentu di arbitrahe ta felistá Norberto Da Silva pa e logro aki un biaha mas i ta deseá Norberto hopi éksito pa futuro!
21 yanüari 2024
