Ahuste salarial pa empleadonan Publiko ku salario bou di salario mínimo.
Na: Minister di BPD
Sr. Ornelio Martina
Plasa Horacio Hoyer 9
Presente
Willemstad, 7 febrüari 2024
Tópiko: Ahuste salarial pa empleadonan Publiko ku salario bou di salario mínimo.
Honorabel sr. Martina,
Suskrito a tuma nota ku entrante 1 di yanüari 2024, Minister di Desaroyo Sosial, Labor i Bienestar a anunsiá subida di sueldo mínimo pa ANG 11,48 pa ora. Esaki ta enserá ku entrante e fecha ei, sueldo mínimo pa trahadónan ku ta laborá 40 ora pa siman, ta ANG 1.953,70 pa luna.
Parlamento di Kòrsou ta na altura ku den aparato Públiko, tin trahadónan ku aktualmente ta kobrando ménos ku sueldo mínimo. Un ehèmpel den Enseñansa ta Klasse Assistenten, di kua schaal 10, trede 1-7 ta kai bou di e montante di minimumloon... Esaki ta trese kuné ku tin empleado di Gobièrnu ku ta risibiendo ménos ku lokual lei ta stipulá.
Komo kontesta riba preguntanan hasí na Minister durante tratamentu di presupuesto, Minister a rekonosé ku tin salarionan den aparato públiko ku ta bòu di minimumloon. Durante e reunion aki, Frakshon di PAR a presentá un moshon pa rektifiká esaki, ku lamentablemente a wòrdu rechasá dor di koalishon.
Pa e motibu aki suskrito ta aserká Minister, ku e siguiente preguuntanan:
- Kua ta e schaal/trede -nan den aparato públiko di kua e salario ta kai bou di minimumloon?
- Kuantu trahadó tin aktualmente den e schaal/trede -nan aki?
- Kua ta e motibu dikon e salarionan aki no a wòrdu ahustá pareu ku e ahuste di salario minimo a drenta na vigor dia 1 yanüari 2024?
- Minister por informá suskrito pa ki fecha konkretamente lo hasi e ahuste nesesario pa garantisá ku tur empleado públiko ta risibí un salario ku ta kuadra ku e minimumloon nobo?
Nos ta spera ku Minister Martina lo kontesta e preguntanan aki mas pronto posibel i hasi e ahustenan nesesario pa koregí e posishon di e empleadonan aki, konforme nan derecho.
Atentamente,
Quincy Girigorie
Lider di Frakshon di PAR
