AQUALECTRA I NUCAPITAL ASPIRAVI A DUNA INISIO NA TRABOUNAN PA PARKE DI MULINA NA KORAL TABAK
AQUALECTRA I NUCAPITAL ASPIRAVI A DUNA INISIO NA TRABOUNAN PA PARKE DI MULINA NA KORAL TABAK
Willemstad 15 di Februari 2024 – Aqualectra i NuCapital Aspiravi a duna inisio na e trabounan pa konstrukshon di sinku mulina di bientu ku lo ta un kontribushon importante den Aqualectra su esfuerso pa ta mas konfiabel, pagabel i sostenibel. Unabes e mulinanan ta operashonal i konektá riba e ret di Aqualecta Kòrsou por konta ku un penetrashon di energia duradero di no ménos ku 50%. Na e okashon akí, banda di sr. Roy Kolader, Managing Director di NuCapital i sra. Neysa Isenia, CFO di Aqualectra, a hiba palabra Minister enkargá ku Desaroyo Ekónomiko sr. Ruisandro Cijntje i Minister enkargá ku Tráfiko, Transporte i Planifikashon Urbano sr. Charles Cooper. Minister Presidènt sr. Gilmar Pisas a hasi e akto simbóliko pa inisia e trabounan.
Ampliashon ku un parke di mulina na Koral Tabak ta parti di un esfuerso di Aqualectra na kaminda pa un futuro desaroyá i kumpli ku su tarea di ta e kompania konfiabel i pagabel. E reto akí ta sigur imporante si tuma na konsiderashon e kresementu ekonómiko notabel di nos isla, kambio di klima i Aqualectra su kompromiso ku nos planeta. Ku atkisishon di e Parke di Mulina na Koral Tabak ta hasié posibel pa premirá ku den 2030 nos por konta ku no ménos ku 70% energia generá for di fuentenan duradero, loke ta hasi Kòrsou esun promé den Reino. E ta kontribuí tambe di un manera supstanshal na baha nos preis di koriente, baha nos importashon di fuel, redusí nos emishon di gas den atmósfera i ta kontribuí na mehorá nos balansa di pago.
Konstrukshon di e parke di mulina na Koral Tabak ta posibel danki na e konfiansa i sosten di Nu Capital Aspiravi, nos bankonan lokal, invershonistanan, Gobiernu di Kòrsou en partikular Minister Cijntje i Minister Cooper.
