FIRMAMENTU DI DEKRETO NASHONAL DI KOMISHON DI INDUSTRIA KREATIVO DI KÒRSOU

Willemstad, djaweps 15 di febrüari 2024 – E Minister di Desaroyo Ekonómiko i e Minister di Enseñansa, Siensia, Kultura i Deporte a firma e dekreto nashonal (landsbesluit) di komishon di Industria Kreativo di Kòrsou parti mainta den un ambiente ameno i kreativo.

E dekreto ta regla e establesimentu di un komishon ku representantenan di sektor públiko i privá ku lo promové kolaborashon den sektor kreativo i mehorá kordinashon di e sektor kreativo den e 4 añanan benidero.

E instalashon di e komishon ta un di e akshonnan di e Strategia di Eksportashon Nashonal di Kòrsou (NES) 2022-2027 pa sektor di Industria Kreativo. Curaçao NES 2022-2027 pa sektor di Industria Kreativo ta un dokumentu ofisial di Gobièrnu di Kòrsou prepará ku sosten tékniko di International Trade Centre (ITC) basá riba investigashon i konsulta di partnernan importante den industria kreativo na Kòrsou. E strategia di eksportashon ta enfoká riba desaroyo di tres subsektornan ku tin potensial fuerte di eksportashon manera músika, video/pelíkula i merkadeo, komunikashon i diseño web (MarCom), pero no ta ekskluí otro subsektornan di industria kreativo.

Asosiashonnan di sektor kreativo, manera Asosiashon di Músiko i Artista di Kòrsou (AMAK), pero també e “Film Commissioner“ di Kòrsou i entidatnan di apoyo manera Kámara di Komèrsio i CBS ta forma parti di e komishon banda di otro organisashonnan prominente. Miembronan di e komishon mester determina prioridatnan pa e promé 2 aña mará na un presupuesto ku lo ser presentá na posibel kofinansiadónan manera Gobièrnu pero també sektor privá.

Algun punto di akshon for di e plan di akshon di NES 2022-2027 pa e sektor di Industria Kreativo di Kòrsou ta inkluí kuantifikashon di e sektor kreativo i e aplikashon di métodonan pa por midi su prestashon regularmente; prioritisashon i posibel establesimentu di un asosiashon ku ta kubri tur subsektor ku ta forma parti di sektor kreativo i introdusí un siman di desaroyo di Industria Kreativo (“Creative Industries Development Week”).

Olga Kohmula, konsehero asosiá, di strategia di komèrsio i kompetensia na ITC, tambe tabata presente na e momentu konmemorativo aki i a hiba palabra.

E ministernan a firma e dekreto den presensia di miembronan di e komishon i algun otro stakeholder. Pa e Minister di Desaroyo Ekonómiko, e firmamentu di e dekreto aki ta nifiká un promé paso pa duna un realse na e industria kreativo di Kòrsou. E Minister di Enseñansa, Siensia, Kultura i Deporte a pone enfoke riba abilidat i kultivá talento. A klousura e evento ku un baile ku ta simbolisá kolaborashon.

MAS NOTISIA

Ministerio konserní:Desaroyo Ekonómiko