INBOX: Suidadano ta rektifiká loke Vigilante a skibi ku a sosode ku n’e
Apresiabel Kiko Ta Pasando,
Mi a bai kumpra un tire na Mario Tires services ku ta situá na Rooseveltweg. Ora nan ta drecha tire pa mi, e meneer di ku mi ku e riem ta doblá i airu no ta keda pa semper. Mi di ‘meneer si airu ta sali lo mi trese otro riem pa bo’. Al final airu a sali den siguiente dia. Mi a trese otro riem. Despues e meneer pa kambi’e e di ku mi ku mi tin ku paga. Mi di kuné ta e siman aki mi a kumpra e riem serka bosnan. El a yama un señora ku ta responsabel dje negoshi. E señora a yega, e di ku mi si mi no ke paga e ta yama polis pa mi. Mi di kuné ‘yama polis mas mihó pasó polis ta proteha i sirbi’.
E señora a kue telefon i a bel diferente biaha. Mi a sinta warda polis bin mas ku mei ora. Ora mi a sinta mei ora polis no a bin, mi señora a yama polis e mes, anto polis di ‘duna e señora e telefon p’e papia kuné’. E señora no tabata ke papia ku polis na telefon. A bin sali na kla ku e doño di negoshi no a bel polis pa mi, el a bel delekuente pa bin bati mi. Net na momento ku e delekuente a yega e señora a sinti mas forsa, e señora a bula riba mi señora. Mi a bin para komo intermediario pa nan no bringa. Na e momento ey señora su delekuente a sirbi mi un serbes tras di mi kabes, mi a kai, delekuente a kue piedra masha grandi mes pa tira riba mi. Mi a kore lanta pa mi no alkansa e piedra. E a bai kue manga di djek grandi pa dal mi kuné. Mi a kore krusa kaya drenta den auto di hende pa salba mi bida. Na momento ku mi tabata den auto di e hende, net un auto di politur tabata biniendo. Mi a baha for di auto pa kore para dilanti di e auto di politur pa pidi ousilio. Despues polis a yega i ambulans tambe. E dia ey mi a pèrdè mi pòtmòni. Despues mi a hañ’e, maske ku mi a pèrdè mi sèn ku tabata tin den dje, pero mi a haña mi dokumentonan. Nan a detené mi señora i doño di e negoshi Mario Tires services i ami a bai CMC pa kose mi kabes.
