Women’s Steering Committe Curaçao ta boga pa bon uso di nos idioma materno

WILLEMSTAD – E siman aki,den kua nos ta kuliminá e periodo den kua Nashonanan Uní (UN) ta boga paisnan miembro di UN i tambe organisashonnan den e paisnan pa dediká atenshon na e importansia di idioma materno. Women Steering Committee Curaçao (WSCC), meskos ku hopi organisashon na hopi parti di mundu,  tambe ta dediká atenshon na elevá nos idioma materno; Papiamentu.

“Idioma ta esensial pa kresementu di un komunidat, sigurá variedat kultural i pa fasilitá komunikashon i diálogo,”sra. Mirieta Lourens, presidente di WSCC a bisa.

“Nos papiamentu ta alabes importante pa kooperashon i edukashon di nos komunidat.  Ku selebrashon di Lenga Materno, Nashon Uní ta boga pa protekshon i maneho di tur idioma materno i su uso. UN alabes ta enkurashá pa tuma diferente akshon pa preservá i protehá idiomanan ku mester sirbi komo vehíkulo di komunikashon. Aplikashon di idioma materno den edukashon i enseñansa ta di vital importansia pa desaroyo di abitantenan di nos nashon,” sra. Lourens a sigui bisa. “Komo un organisashon ku, ya pa 50 aña, ta enfoká riba desaroyo di nos miembronan i nos komunidat en general, Women’s Steering Committee Curaçao (WSCC) ta stimulá bon uso di nos idioma materno Papiamentu, tantu verbal, komo por eskrito.

“Otro aspektonan ku nos ke tira lus riba dje komo WSCC ta ku abitantenan di mas ku 40 pais na mundu no tin e benefisio ku nan yunan ta risibí instrukshon na skol den nan idioma materno. Serka nos esei  no ta e kaso i ta algu ku nos mester ta orguyoso di dje i sigui empoderá. Nos komo WSCC lo sigui hasi tur loke ta nos alkanse pa stimulá bon uso di nos dushi Papiamentu bou di nos miembronan i ta boga pa kada siudadano i organisashon tambe hasi esei . Un komunidat bon prepará ta garantia pa progresá. Nos lo sigui e trayektoria inisiá pa mamanan fundadó di WSCC  pa sigui organisá seshonnan informativo pa empoderá nos miembronan. Ban duna Papiamentu e pedestal ku e meresé”  presidente di WSCC a klousurá bisando.