Delegashon di Parlamento di Kòrsou na “Secretaría del Habitat” (SDHT) di e alcaldía na Bogotá.

Delegashon di Parlamento a asistí na “Secretaría del Habitat” (SDHT) di e alcaldía na Bogotá. E delegashon a risibí presentashon di e aktividatnan ku nan komo sekretariado ta enkargá kuné i nan meta i vishon riba e tereno di bibienda.

Bogotá, djaweps 7 di mart 2024, e delegashon di Parlamento di Kòrsou a asistí na “Secretaría del Habitat” (SDHT) di e alcaldía na Bogotá. Akinan sr. Alejandro Quintero a duna e delegashon un presentashon di e aktividatnan ku nan komo sekretariado ta enkargá kuné i nan meta i vishon riba e tereno di bibienda.

Manera nos a indiká den e komunikadonan anterior, ku e maneho nobo di bibienda yamá “Mi Casa Ya” keda hisá riba nivel nashonal, esta di estado. Sinembargo kada siudat tin su propio polítika interno di bibienda. Esaki ta nifiká básikamente ku kada siudat por duna nan propio kontenido na e proyekto aki, por ehèmpel riba kua grupo den nan komunidat ta pone e énfasis i di ki forma i maneho interno nan ta realisá e diferente bibiendanan.

Den e kaso di aki SDHT a deliniá nan liñanan di strategia den sinku punto di salida.

1)        Atministrá di un manera efisiente, e rekursonan dirigí riba e oferta i demanda di bibienda sosial.

2)        Insentivá e desaroyo sostenibel di bibienda sosial atraves di instrumentonan públiko i privá.

3)        Mehorá e akseso i kobertura di e servisionan públiko ku ta esensial.

4)        Promoshon i desaroyo di proyektonan di obra públiko ku ta revitalisá e teritorionan.

5)        Desaroyo di strategianan pa mehorá e posibilidat di habitá bibiendanan den kondishonnan digno.

A base di e strategianan ariba menshoná, SDHT a splika nan ròl. Ehèmpelnan ku por menshoná ta promové i generá solushonnan di bibienda i tambe intervení den barionan di mas vulnerabel.

Tambe tin e proposishon di revitalisashon. Akinan ta referí na oportunidat di desaroyo di bibienda riba tereno di infrastruktura pa transporte. Por pensa riba invershon den kabelnan aéreo pa akseso na barionan di Bogotá.

Riba tereno di servisio públiko lo bai benefisiá masoménos 7300 hogar pa medio di insentivonan finansiero.

Den pasado anteriormente na e proyekto di “Mi Casa Ya”, a inisiá diferente proyekto pa traha kas pa habitante pero pa diferente motibu e konstrukshon di kasnan no a finalisá. Akinan SDHT ta mira un oportunidat pa reaktivá e kompra i konsekuentemente reaktivá e bibienda. E intenshon ta pa entre otro bini akinan tambe ku insentivo finansiero pa logra e meta.

SDHT a indiká ku pa reaktivá e ekonomia atraves di bibienda, mester rekuperá e konfiansa den e insentivonan públiko pa famianan i duna hèrmèntnan na e sektor di konstrukshon. SDHT ta komprometé di bai aktivá e proseso di inisiativa pa medio di diferente programa di urbanisashon di tereno i oferta di preferensia.

Finalmente SDHT a enfatisá ku e maneho nashonal di “Mi Casa Ya” ta duna oportunidat pa realisá e diferente proyektonan ku nan ta haña importante pa e siudat di Bogotá.