Konforme ekspektativa di merkado internashonal CBCS ta mantené e nivel aktual di su tasa di interes ofisial

WILLEMSTAD/PHILIPSBURG – Centrale Bank van Curaçao en Sint Maarten (CBCS) a tuma e
desishon di mantené su maneho monetario aktual sin kambio i tene su tasa di interes ofisial
na 5,75%.1
E desishon akí ta basá riba e espektativanan di merkado, esta, ku Reserva Federal
Estadounidense (Fed) ta bai mantené su tasa di interes ofisial aktual, miéntras ku inflashon na
Estádos Unídos ta sigui baha. Ademas, maske ta premirá un bahada leve den nos reserva ofisial
bruto, ta premirá ku kobertura di importashon lo sigui stabil durante 2024, na un nivel
kómodamente mas haltu ku e norma di tres luna. Un kobertura di importashon adekuá ta
sostené e meta prinsipal di e maneho monetario di CBCS, esta mantené e stabilidat di e tasa
di kambio fiho di e florin antiano hulandes na e dòler merikano. Aunke riba korto plaso no ta
premirá muchu kambio den e indikadónan ku ta sirbi komo base pa maneho monetario, ainda
tin insertidumbre.
Segun e kálkulonan mas resien, e défisit riba kuenta koriente di balansa di pago di e union
monetario a kai, di 19,1% di PIB na 2022 te 15,1% di PIB na 2023. I segun proyekshon, e lo sigui
baha te 13,7% den 2024. ‘E bahada proyektá pa 2024 ta debí na un oumento di PIB nominal den e
union monetario, kombiná ku un défisit mas abou riba kuenta koriente. Sin embargo, a revisá e
bahada di défisit riba kuenta koriente i e proyekshon nobo ta mustra un bahada ménos fuerte. Esei
ta debí na un oumento mas abou den eksportashon neto di produkto i servisio’. Asina direktor
ehekutivo di CBCS, dr. José Jardim a splika. ‘A revisá e sifra di eksportashon neto di produkto i
servisio debí ku eksportashon ta subiendo ménos fuerte ku loke a proyektá inisialmente,
prinsipalmente pa loke ta trata divisa estranhero generá den turismo. Un nivel di importashon mas
haltu, impulsá prinsipalmente pa mas invershon privá na Kòrsou, ta moderá e revishon akí’, Jardim
a sigui bisa. Tambe, a baha e sifra proyektá pa tantu e balansa di entrada komo e balansa di
transferensia koriente pa 2024.
Despues di un oumento di NAf. 169,8 mion na 2023, prinsipalmente debí na transferensia di fondo
di parti di World Bank pa rekonstrukshon di Sint Maarten i di algun fondo di penshun for di eksterior,
ta proyektá un bahada leve den nos reserva ofisial bruto den transkurso di 2024. Pero apesar di e
bahada proyektá, ta premirá ku den 2024 nos kobertura promedio di importashon lo permanesé
na e mesun nivel di 4,7 luna, loke ta kómodamente riba e norma di 3 luna. Te dia 23 di febrüari
2024, reserva ofisial bruto a kai ku NAf. 57,4 mion, pero kobertura di importashon a keda stabil na
4,7 luna.
1 Tasa di interes ofisial’ òf ‘beleningsrente’ ta e tasa ku CBCS ta ofresé e bankonan komersial pa fiansa den kaso ku nan tin
falta di likides.
Por lo demas, despues di un oumento na 2023, likides di e bankonan komersial a baha den e
promé dos lunanan di 2024. Esei ta debí prinsipalmente na e echo ku tabatin un kompra neto di
divisa, retiro di saldo na dòler na Banko Sentral di parti di e bankonan komersial, e oumento den e
reservanan obligatorio i un kompra neto di sertifikado di depósito (CD).
Fed no a kambia su tasa di interes ofisial mas for di yüli di 2023, mirando ku, aunke e perspektiva
di inflashon a bin ta baha un poko, ainda e ta mas haltu ku e ophetivo di 2,0%. E kambionan ku Fed
lo disidí di hasi den futuro ta dependé prinsipalmente di desaroyo di inflashon, e perspektivanan
ekonómiko i un evaluashon di e faktornan di riesgo positivo i negativo. Debí na e tasa di kambio
fiho entre NAf. i dòler estadounidense, oumento di e tasa federal tin un efekto inmediato riba e
tasanan di merkado monetario internashonal i, p’esei mes tambe, riba e tasanan di interes di e
union monetario di Kòrsou i Sint Maarten. Sin embargo, segun espektativa di merkado, Fed lo no
baha su tasa tanten ku no tin mas konfiansa ku inflashon ta moviendo na un manera sostenibel
den direkshon di e ophetivo di 2 porshento.
‘En bista di lo anterior, CBCS a tuma e desishon di laga su tasa ofisial na 5,75%, manteniendo asina
un márgen di 25 punto básiko riba e tasa di Reserva Federal Estadounidense. Por lo demas, CBCS
lo sigui ofresé sertifikado di depósito ku plaso di madures mas largu (di 12, 26 i 52 siman) na e
emishonnan ku ta tuma lugá kada dos siman, pa asina likides di e bankonan por keda mas largu
riba merkado doméstiko i asina yuda mantené un posishon sólido di divisa’, dr. Jardim a konkluí.

Willemstad, 8 di mart 2024
CENTRALE BANK VAN CURAÇAO EN SINT MAARTEN