12 mrt 2024

E proyekto akí ta bai tokante ponementu di tubu di peilu den tera, huntu ku Rijkswaterstaat.

Dia 12 di mart tabatin un inisio spesial: diputado Cicilia i ministerio di Infrastruktura i Maneho di Awa huntu a selebrá komienso di un proyekto importante. E proyekto akí ta bai tokante ponementu di tubu di peilu den tera, huntu ku Rijkswaterstaat. Den luna di mart nos a kuminsá ku ponementu di e tubunan akí pa haña sa mas tokante awa bou di tera. Esaki ta bai dura mas òf ménos 3 luna i e ta importante pa komprendé mas mihó kon awa bou di tera na Boneiru ta move.

Nos ta pone e tubunan akí, ku nos ta yama tubu pa peilu, no solamente na Playa pero na otro sitionan tambe. Pa medio di e tubunan pa peilu akí nos por mira kuantu awa tin bou di tera i si e awa akí ta limpi. Nos no ta kontrolá solamente e awa ku tin bou di tera, pero tambe awa di laman i kon awa di yobe ta kore bai. Nos ta bai investigá si tin supstansia malu  den e awa bou di tera ku ta bai laman, i ku no ta bon pa nos koralnan bunita. Esaki ta importante pa sa, di manera ku nos por kuida nos isla i e laman rònt di dje bon. Ta importante tambe pa wak bon kon awa di yobida ta kore bai. Esaki ta yuda nos pa kuida nos awa mas mihó i pa mehorá agrikultura.

Nos ta ehekutá e proyekto akí den kolaborashon ku diferente organisashon i nos ta kuminsá na e parti sùit di nos isla. Ta bai dura mas òf ménos 3 luna pa pone tur e tubunan di peilu den tera. E tubunan di peilu akí ta keda algun aña den tera i kada aña nos ta bai kontrolá nan. Nos ta bai wak si tin supstansia malu den awa bou di tera ku no ta bon pa koral i/òf nos tera pa agrikultura.

Diputado Cicilia a pone énfasis riba importansia di e proyekto akí: ‘Pa medio di pone e tubunan pa peilu akí, nos ta haña informashon balioso tokante nos awa bou di tera. Esaki ta un paso importante pa protehá e bunita naturalesa di Boneiru i nos presioso awa i koral pa generashonnan di futuro.’