Ministerio di GMN huntu ku stakeholders ta uni forsa pa… Operashon Siman Santu 2024

 

Willemstad – Resientemente tabatin un reunion na Ministerio di GMN di tur stakeholders relashoná ku Siman Santu. Ta trata aki di un kolaborashon i koperashon di diferente ministerio di gobièrnu i organisashonnan privá ku ta uní forsa pa huntu durante Siman Santu garantisá órden públiko i seguridat na playanan, riba laman, riba nos kareteranan i kosta di Kòrsou.

 

Operashon Siman Santu (OSS2024) ta bira operashonal for di djárason dia 27 di mart próksimo i ta finalisá djamars dia 2 di aprel 2024 basá riba palabrashonnan mutuo, koperashon boluntario i estrecho di su stakeholders. Atrabes di añanan Operashon Siman Santu a demonstrá ku e kolaborashon di tur stakeholder ta sumamente importante pa garantisá seguridat, limpiesa i órden públiko durante Siman Santu.

Stakeholders ku lo traha huntu durante Operashon Siman Santu ta:

• Kuerpo Polisial (KPC): Tim di Montaña, Barber, Punda i Otrabanda lo sòru pa
  mantenshon di órden públiko, kòntròl di tráfiko i asistensia na otro stakeholders.
  ●  Brandweer (BWC): Seguridat i prevenshon relashoná ku kandela.
  ●  Ministerio di GMN: Kontròl riba benta i higiena di konsumo (THZ), kontròl i limpiesa
  riba playanan (MNB), kontakto ku piskadónan i kordinashon di OSS 2024.
  ●  Ambulans (FKAK): Duna kuido i asistensia na momentu di emergensia.
  ●  Kustwacht den koperashon ku Citro: Órden, vigilansia i seguridat riba laman.
  ●  Ofisina di Turismo (CTB): Optimalisá seguridat i kordinashon na playanan públiko.
  ●  Politur: Duna asistensia kual ta enserá ku nan lo patruyá di forma mas frekuente
  na áreanan di konsentrashon i duna asistensia na turista kaminda ta nesesario.
  ●  Inspekshon di Ministerio di Desaroyo Ekonómiko: Kontròl riba aspektonan manera
  pèrmit ekonómiko, indikashon di preis i kumplimentu ku leinan ekonómiko.
  ●  Selikor: Entre otro, rekohé shushi den kònteiner i kambia kontenido tualètnan portátil.
  ●  Krus Kòrá: duna promé asistensia riba djabièrnè santu.
  ●  Janthiel Security: Seguridat den área di Janthiel, Brakkeput i Sint Joris.

  Metanan di e proyekto di OSS2024 ta pa garantisá entre otro:
  ●  Limpiesa i mantenshon di playanan públiko.
  ● Kontròl riba benta di alimento konforme reglanan di higiena i pèrmitnan eksistente.

  ●  Seguridat di turistanan i personanan lokal na playanan públiko i áreanan turístiko.
  ●  Redusí robo i atrako na nos playanan.
  ●  Fasilitá i intermediá ku piskadónan momentu ku esaki ta nesesario.
  ●  Órden Públiko riba karteranan ku ta bai Bándabou i Caracasbaai.
  ●  Aksesibilidat via di kayanan pa playanan públiko.
  ●  Duna informashon i konsientisá bishitantenan i públiko en general.

Nos grupo di enfoke ta pueblo en general, personanan ku ta bai kamper (keda drumi) na playanan, personanan ku ta bai landa na nos playanan, personanan ku boto i/ òf seadoo, personanan ku ta bai sambuyá i snòrkel, piskadónan i turistanan.

Djamars awor dia 26 di mart lo tin un konferensha di prensa kaminda lo suministrá informashon adishonal. Ban pasa un Siman Santu den pas, union i harmonia.