Servisio Meteorológiko Kòrsou ta publiká e promé perspektiva pa e Temporada di Orkan 2024.

E aña aki ta premirá un Temporada di Orkan mas aktivo ku aña pasa konforme
investigashon di e prestigioso universidat di Colorado. Motibu pa esaki ta entre otro
temperatura haltu di e superfisie di Osean Atlántiko i Karibe den kombinashon ku
kondishon atmosfériko favorabel pa e luna di yüni pa novèmber. E kondishonnan
atmosfériko favorabel den nos region lo ta resultado di e fenómeno La Niña den
Oséano Pasífiko.
E temporada di orkan di aña pasa tabata basta aktivo ku 20 sistema ku nòmber
(normal 14), 6 orkan (7) i 3 orkan mayó (3). E aklarashon tabata ku no opstante ku
tabata tin e fenómeno di El Niño ku ta krea kondishonnan atmosfériko no favorabel
den Karibe, e temperatura haltu di e superfisie di Osean Atlántiko i Karibe a pone ku
tabata tin mas formashon di sistemanan tropikal aña pasa. Opservashonnan aktual ta
indiká ku e temperatura di superfisie di Osean Atlántiko i Karibe ta haltu i ku durante
lunanan benidero por sigui oumentá. Adishonalmente e área di laman pega ku kosta
di Perú ta mas friu ku normal kual ta indikando ku e fenómeno di El Niño lo transitá i
bira La Niña den e próksimo lunanan. E dos faktornan aki lo pone ku lo tin mihó
kondishon pa desaroyo di orkan den Oséano Atlántiko i laman Karibe i ta premirá un
temporada aktivo ku 23 sistema ku nòmber (normal 14), kual 11 por bira orkan (7) di
kual 5 orkan mayó (3).
Manera ta konosí Tormenta Tropikal òf un Orkan ta generá entre otro bientu
destruktivo, áwaseru torensial i laman brutu kual por peligrá bida i destruí propiedat.
Den e kuadro aki Servisio Meteorológiko Kòrsou, komo e instansia ofishal i
responsabel pa vigilá, duna konseho na Outoridatnan i saka atvertensia pa orkan ta
sigui tur e desaroyonan aki i ta konsehá komunidat pa kuminsá tuma e pasonan
nesesario pa ta bon prepará pa e temporada di Orkan.
E preparashon lo mester enserá pa kada siudadano tin konosementu di e peligernan
menshoná pa nan famia, kas òf kompania. Ademas, tin un plan ku tur lokual mester
tin na kas i kon mester aktua den kaso di un menasa. Tambe ta bon pa e siudadano ta
na altura unda por haña tur e informashon ofishal di orkan na Kòrsou
(www.meteo.cw).
Den kaso ku tin un menasa, mester ehekutá e plan i sigui e mensahenan ofishal di
gobiernu.
Servisio Meteorológiko Kòrsou ta sigui vigilá situashon di tempu den region Karibe.